പനാജി: ലോകഫുട്ബോളിന്റെ ആവേശമായ ക്രിസ്റ്റ്യാനോ റൊണാൾഡോ ഗോവയിൽ. പനാജിയിലാണ് ഫുട്ബോൾ ആരാധകർക്കായി കായിക വകുപ്പിന്റെ കൂടി പിന്തുണയോടെ സൂപ്പർതാരത്തിന്റെ പ്രതിമ സ്ഥാപിച്ചത്. കാലാൻഗൂതേ മേഖലയിലെ നഗരചത്വരത്തിലാണ് പോർച്ചുഗലിന്റെ ഫുട്ബോൾ താരത്തിന്റെ വെങ്കലനിറത്തിലുള്ള പൂർണ്ണകായ പ്രതിമയുള്ളത്.
ഗോവയിലെ ഫുട്ബോൾ ആരാധകർക്കായി 410 കിലോ ഭാരമുള്ള പ്രതിമയാണ് ഉയർന്നത്. ആറടി ഉയരത്തിൽ പന്തുമായി താരം മുന്നേറുന്ന രീതിയിലാണ് പ്രതിമ.12 ലക്ഷം രൂപയാണ് പ്രതിമയ്ക്ക് ചിലവായത്. ഇന്ത്യയിൽ ഇതാദ്യമായാണ് ക്രിസ്റ്റ്യാനോയുടെ പ്രതിമ സ്ഥാപിക്കപ്പെടുന്നത്.
‘ഇത് എല്ലാ യുവാക്കൾക്കുമായി സമർപ്പിക്കുന്നു. ഫുട്ബോളിനെ നിങ്ങൾക്ക് മറ്റൊരു ഉയർന്ന തലത്തിലേക്ക് എത്തിക്കണമെങ്കിൽ എല്ലാവരും മാതൃകയാക്കേണ്ട താരം ക്രിസ്റ്റ്യാനോ തന്നെയാണ്. സംസ്ഥാന കായികവകുപ്പും, മുൻസിപ്പാലിറ്റിയും പഞ്ചായത്തുകളും ഒരു പോലെ ഫുട്ബോളിനെ സ്നേഹിക്കുന്നു. സംസ്ഥാനത്തെ കുട്ടികൾക്കും യുവതിയുവാക്കൾക്കും കായിക ലോകത്ത് തിളങ്ങാനുള്ള എല്ലാ അവസരവും ഒരുക്കുകയാണ്.’ ഗോവ മന്ത്രി മൈക്കിൾ ലോബോ പറഞ്ഞു.
ക്രിസ്റ്റ്യാനോയുടെ പ്രതിമ സ്ഥാപിക്കുന്നതിനെതിരെ തുടക്കത്തിൽ ചിലർ രംഗത്തെത്തി യതിനെ മന്ത്രി വിമർശിച്ചു. ലോകത്തെ എല്ലാ രാജ്യങ്ങളും കളിക്കുന്ന കായിക ഇനമാണ് ഫുട്ബോൾ. ഏതു കോണിലെ പ്രതിഭകളും ലോകശ്രദ്ധനേടുന്നകാലമാണിത്. ആ നിലയ്ക്ക് നമ്മുടെ നാട്ടിലെ ഒരുകൊച്ചുകുട്ടിയുടെ പോലും ആരാധനാപാത്രമായ ക്രിസ്റ്റ്യാനോയുടെ പ്രതിമയെ സ്വാഗതം ചെയ്യുകയാണ് വേണ്ടതെന്നും ലോബോ പറഞ്ഞു.
Comments