കോൺഗ്രസ് തകർന്നാലുണ്ടാകുന്ന ശൂന്യത നികത്താൻ ഇടതുപക്ഷത്തിനാകില്ല ; അവിടെ ആർ എസ് എസ് ഇടം പിടിക്കുമെന്ന് ബിനോയ് വിശ്വം

കൊച്ചി : കോൺ​ഗ്രസ് തകർന്നാൽ ഇന്ത്യൻ രാഷ്‌ട്രീയത്തിലുണ്ടാകുന്ന ശൂന്യത നികത്താൻ ഇടതുപക്ഷത്തിനാകില്ലെന്ന് സി.പി.ഐ നേതാവ് ബിനോയ് വിശ്വം എം.പി. ഇടതുപക്ഷത്തിന് അതിനുള്ള കെൽപ്പില്ല. കോൺ​ഗ്രസ് തകർന്നു പോകരുതെന്നാണ് താൻ ആഗ്രഹിക്കുന്നതെന്നും ബിനോയ് വിശ്വം പറഞ്ഞു.കൊച്ചിയിൽ പി.ടി തോമസ് അനുസ്മരണ പരിപാടിയിൽ സംസാരിക്കുകയായിരുന്നു ബിനോയ് വിശ്വം

കോൺഗ്രസുമായി തനിക്ക് വിയോജിപ്പുണ്ട്. എന്നാൽ, കോൺഗ്രസ് തകർന്നാൽ ആർ എസ് എസ് ശക്തികൾ ഇടം പിടിക്കും. ഇക്കാര്യം തിരിച്ചറിയണം . കോൺഗ്രസ്‌ രാഷ്‌ട്രീയത്തിന്‍റെ കാതൽ നെഹ്‌റുവിന്‍റെ രാഷ്‌ട്രീയം ആയിരുന്നു. ഇതിൽ കോൺഗ്രസ്‌ പാർട്ടിക്ക് അപചയമുണ്ടായി. ഇന്നത്തെ ഇന്ത്യൻ രാഷ്‌ട്രീയത്തിൽ കോൺ​ഗ്രസ് തകർന്നാൽ ശൂന്യതയുണ്ടാകും. കോൺഗ്രസിന് മാത്രമേ ആ ശൂന്യത നികത്താൻ കഴിയുകയുള്ളൂവെന്നും ബിനോയ് വിശ്വം പറഞ്ഞു