കൊറോണയുടെ പുതിയ വകഭേദമായ ഒമിക്രോണ് ലോകമെമ്പാടുമുള്ള വിവിധ രാജ്യങ്ങളില് ആശങ്ക സൃഷ്ടിച്ച് പടര്ന്ന് പിടിച്ച് കൊണ്ടിരിക്കുകയാണ്. യുകെ, യുഎസ് തുടങ്ങിയ രാജ്യങ്ങളിലെല്ലാം അതിവേഗമാണ് ഒമിക്രോണ് കേസുകള് പടര്ന്നു കൊണ്ടിരിക്കുന്നത്. ഇന്ത്യയിലും ഒമിക്രോണ് രോഗികളുടെ എണ്ണം അതിവേഗമാണ് വര്ദ്ധിക്കുന്നത്. കഴിഞ്ഞ ഒരാഴ്ച കൊണ്ട് ആഗോളതലത്തില് കൊറോണ കേസുകളുടെ എണ്ണത്തില് 11 ശതമാനത്തിന്റെ വര്ദ്ധനവാണ് ഉണ്ടായത്. ഒമിക്രോണ് ബാധിച്ചവരില് ഡെല്റ്റയെ അപേക്ഷിച്ച് മരണനിരക്ക് കുറവാണ് എന്നത് മാത്രമാണ് ആശ്വാസം പകരുന്ന ഒരേ ഒരു കാര്യം. എങ്കിലും ഒമിക്രോണ് രോഗലക്ഷണങ്ങളെ ജാഗ്രതയോടെ കാണണമെന്നും, ആവശ്യമായ മുന്കരുതലുകള് സ്വീകരിക്കണമെന്നും ലോകാരോഗ്യ സംഘടനയും വ്യക്തമാക്കിയിട്ടുണ്ട്.
ഒമിക്രോണിന്റെ പ്രധാന ലക്ഷണങ്ങളായി പറയുന്ന കാര്യങ്ങള് ഇവയാണ്. ചെറിയ പനി, തൊണ്ട വേദന, തുമ്മല്, ക്ഷീണം, മൂക്കൊലിപ്പ്, ശരീരത്തിന് താങ്ങാനാകാത്ത വേദന, അമിതമായ വിയര്ക്കല് എന്നിവയെല്ലാം പ്രധാന ഒമിക്രോണ് ലക്ഷണങ്ങളാണ്. ഇതിന് പുറമെ ഛര്ദ്ദി, മനംപുരട്ടല്, വിശപ്പില്ലായ്മ തുടങ്ങിയവയും ചില ഒമിക്രോണ് രോഗികളില് ലക്ഷണങ്ങളായി റിപ്പോര്ട്ട് ചെയ്യപ്പെട്ടിട്ടുണ്ട്. നമ്മുടെ തൊലിപ്പുറത്ത് വരുന്ന ചില മാറ്റങ്ങളും ഒമിക്രോണിന്റെ സൂചനയാണെന്നാണ് വിദഗ്ധര് പറയുന്നത്.
തൊലിപ്പുറത്തുള്ള തിണര്പ്പ് കൊറോണയുടെ ലക്ഷണമായി ആദ്യഘട്ടം മുതല് കണക്കാക്കിയിരുന്നു. ഇത്തരത്തിലുള്ള തിണര്പ്പ് കൊറോണയുടെ പ്രധാന ലക്ഷണമാണെന്നാണ് യുകെയിലെ സോയ് കൊവിഡ് സ്റ്റഡി ആപ്പ് ചൂണ്ടിക്കാണിക്കുന്നത്. ചൂടുകുരു പോലെയുള്ള തിണര്പ്പുകളായിരിക്കും ഇത്. ഇവ ശരീരത്തില് എവിടെ വേണമെങ്കിലും പ്രത്യക്ഷപ്പെടാം. ഇവയ്ക്ക് ചൊറിച്ചില് പോലുള്ള അസ്വസ്ഥതകളും ഉണ്ടാകും. ഇത്തരം ലക്ഷണങ്ങള് കണ്ടാലും ഉടന് പരിശോധന നടത്തണമെന്നും ഡോക്ടര്മാര് നിര്ദ്ദേശിക്കുന്നു.
