മരക്കാർ സിനിമയുടെ ക്ലൈമാക്സിൽ നിന്നും നീക്കം ചെയ്ത രംഗം പുറത്തുവിട്ട് അണിയറ പ്രവർത്തകർ. പറങ്കികൾ പിടികൂടുന്ന കുഞ്ഞാലി മരക്കാറിനെ തുറുങ്കിൽ ക്രൂരമായി ഉപദ്രവിക്കുന്ന ദൃശ്യമാണ് വീഡിയോയിലുള്ളത്. ഈ ദൃശ്യം എന്തിനാണ് നീക്കം ചെയ്തതെന്നാണ് വീഡിയോയ്ക്ക് ലഭിക്കുന്ന കമന്റുകൾ.
ഒരു കരാർ ഒപ്പിടീക്കാനായി മരക്കാറായ മോഹൻലാലിന് ദേഹോപദ്രവം ഏൽപ്പിക്കുന്ന പോർച്ചുഗീസ് കാരാണ് രംഗത്തിലുള്ളത്. മോഹൻലാൽ അതിഗംഭീരമായാണ് അഭിനയിക്കുന്നതെന്നും സിനിമയിലെ വികാര നിർഭരമായ രംഗമാണിതെന്നും ആരാധകർ കുറിക്കുന്നു. ഡിസംബർ രണ്ടിനാണ് ചിത്രം തീയേറ്ററുകളിൽ എത്തിയത്.
ഒരു മലയാള ചിത്രത്തിന് ചരിത്രത്തിൽ ലഭിച്ച ഏറ്റവും വലിയ തീയേറ്റർ കൗണ്ട് ആണ് മരക്കാറിന് ലഭിച്ചത്. രാത്രി 12 മുതൽ കേരളത്തിൽ എമ്പാടും ഫാൻസ് ഷോകളും ആരംഭിച്ചിരുന്നു. തീയേറ്റർ റിലീസിനു പിന്നാലെ ആമസോൺ പ്രൈം വീഡിയോയിലൂടെ ചിത്രത്തിന്റെ ഒടിടി റിലീസും നടന്നു. കഴിഞ്ഞ വർഷത്തെ ദേശീയ ചലച്ചിത്ര പുരസ്കാരങ്ങളിൽ ഏറ്റവും മികച്ച ചിത്രത്തിനുള്ള പുരസ്കാരം മരക്കാറിനായിരുന്നു.
