ജയ്പൂർ : ഓൺലൈനിൽ ആരംഭിച്ച സൗഹൃദം അതിർത്തി കടന്നുള്ള പ്രണയത്തിൽ അവസാനിച്ചപ്പോൾ അതിന് അവസാനമുണ്ടാക്കാൻ പോലീസുമെത്തി . രാജസ്ഥാനിൽ നിന്നുള്ള 25 കാരിയായ യുവതിയാണ് പാകിസ്താനിൽ നിന്നുള്ള കാമുകനെ കാണാൻ അട്ടാരി-വാഗാ അതിർത്തി കടക്കാൻ അമൃത്‌സറിലെത്തിയത് . യുവതി വിവാഹിതയും , രണ്ട് വയസ്സുള്ള കുഞ്ഞിന്റെ മാതാവുമാണ്.
അട്ടാരി-വാഗാ അതിർത്തിയിൽ തന്നെ ഇറക്കിവിടാൻ ഓട്ടോറിക്ഷാ ഡ്രൈവറോട് യുവതി പറയുന്നത് ജാലിയൻ വാലാബാഗിലെ പോലീസുകാരനായ രഞ്ജിത് സിംഗാണ് കേട്ടത് . തുടർന്ന് പോലീസിൽ വിവരമറിയിക്കുകയായിരുന്നു .
യുവതിയുടെ കൈവശം സാധുവായ രേഖകളും ഉണ്ടായിരുന്നില്ല . പാകിസ്താൻ ആസ്ഥാനമായുള്ള പുരുഷന്റെ വിവരങ്ങളും യുവതി വെളിപ്പെടുത്തിയില്ല. തുടർന്ന് ബി-ഡിവിഷൻ പോലീസ് യുവതിയെ തടഞ്ഞുവയ്‌ക്കുകയും രാജസ്ഥാനിലുള്ള കുടുംബത്തെ വിവരം അറിയിക്കുകയുമായിരുന്നു.
യുവതിയുടെ പക്കൽ ആഭരണങ്ങളും പണവും ഉണ്ടായിരുന്നുവെന്നും, യുവതിയെ കൂട്ടിക്കൊണ്ടു പോകാൻ കുടുംബാംഗങ്ങൾ ഒരു ദിവസത്തിനകം ഇവിടെ എത്തുമെന്നും എസ് ഐ അമർജിത് സിംഗ് പറഞ്ഞു. യുവതി 10-12 ദിവസം മുൻപാണ് ഒരു ഓൺലൈൻ ലുഡോ ഗെയിമിനിടെ പാക് യുവാവിനെ പരിചയപ്പെട്ടത്. പിന്നീട് ഫേസ്ബുക്കിലും വാട്ട്‌സ്ആപ്പിലുമായി ബന്ധം വളർന്നു.
യുവാവ് തന്നെ പാകിസ്താനിലേയ്‌ക്ക് ക്ഷണിച്ചുവെന്നും അവർ പറഞ്ഞു. തന്നോട് അട്ടാരി-വാഗാ അതിർത്തിയിലേക്ക് വരാനാണ് യുവാവ് പറഞ്ഞതെന്നും യുവതി പറഞ്ഞു.
