തിരുവനന്തപുരം: കെ റെയില് പ്രചാരണം ശക്തമാക്കാനൊരുങ്ങി സംസ്ഥാന സര്ക്കാര്. കെ റെയിലിന്റെ വിശദാംശങ്ങള് ഉള്പ്പെടുത്തിയ കൈപ്പുസ്തകത്തിന്റെ 50 ലക്ഷം കോപ്പികള് അച്ചടിക്കുന്നു. ഇതിനായി അച്ചടി സ്ഥാപനങ്ങളില് നിന്നും സംസ്ഥാന സര്ക്കാര് ഇ-ടെന്ഡര് ക്ഷണിച്ചു. സിപിഎമ്മിന്റെ സംഘടനാ സംവിധാനം വഴി പ്രചരണ പത്രിക വീടുകളില് എത്തിക്കും. ടെന്ഡര് വിളിച്ചു കൊണ്ടുള്ള പരസ്യം ഇന്നത്തെ പത്രങ്ങളിലാണ് പ്രസിദ്ധീകരിച്ചിരിക്കുന്നത്. ജനുവരി 28 വരെ ടെന്ഡര് സ്വീകരിക്കുമെന്നാണ് അറിയിച്ചിരിക്കുന്നത്.
സില്വര്ലൈന് പദ്ധതിക്കെതിരെ വലിയ രീതിയില് എതിര്പ്പ് ഉയരുന്ന സാഹചര്യത്തിലാണ് നീക്കം. സാധാരണക്കാരായ ജനങ്ങളിലേക്ക് പദ്ധതിയുടെ ലക്ഷ്യം എത്തിക്കുന്നതിന് വേണ്ടിയാണ് കൈപ്പുസ്തകം അച്ചടിക്കുന്നതെന്നാണ് സര്ക്കാരിന്റെ വാദം. സില്വര്ലൈന് അറിയേണ്ടതെല്ലാം എന്ന പേരിലായിരിക്കും കൈപ്പുസ്തകം പുറത്തിറക്കുന്നത്. സംസ്ഥാനത്തെ ആധുനിക സൗകര്യങ്ങളുള്ള അച്ചടി സ്ഥാപനങ്ങളില് നിന്നാണ് ഇ-ടെന്ഡര് ക്ഷണിച്ചിരിക്കുന്നത്.
36 പേജുകളായിരിക്കും കൈപ്പുസ്തകത്തിന് ഉണ്ടായിരിക്കുക. ഇത്തരത്തിലുള്ള 50 ലക്ഷം കോപ്പികള് അച്ചടിക്കും. മള്ട്ടി കളര് പെയിന്റിങ് ആയിരിക്കും പേജുകളില് ഉപയോഗിക്കുന്നത്. സമൂഹമാദ്ധ്യമങ്ങള്ക്ക് പുറമെ ലഘുലേഖകള് വഴിയും സിപിഎം പ്രചാരണം നടത്തിയിരുന്നു. പദ്ധതിക്കെതിരെ എതിര്പ്പ് ശക്തമായി വരുന്ന സാഹചര്യത്തിലാണ് വീണ്ടും കോടികള് മുടക്കിയുള്ള പ്രചാരണ പരിപാടികളുമായി സംസ്ഥാന സര്ക്കാര് മുന്നോട്ട് പോകുന്നത്.
Comments