മഡ്ഗാവ്: ഐഎസ്എല്ലിൽ ഒഡീഷയെ എതിരിലില്ലാത്ത രണ്ട് ഗോളിന് തകർത്ത് കേരള ബ്ലാസ്റ്റേഴ്സ് പോയിന്റ് പട്ടികയിൽ ഒന്നാമത്തെത്തി. തോൽവിയറിയാതെ ബ്ലാസ്റ്റേഴ്സ് പൂർത്തിയാക്കിയ 10ാം മത്സരമാണിത്. ബ്ലാസ്റ്റേഴ്സിന്റെ ചരിത്രത്തിലെ ഏറ്റവും വലിയ അപരാജിത കുതിപ്പാണിത്. ഒന്നാം പകുതിയിലാണ് മഞ്ഞപ്പട രണ്ട് ഗോളുകളും സ്കോർ ചെയ്തത്. വാസ്കോവിലെ തിലക് മൈതാനത്ത് നടന്ന പോരാട്ടത്തിൽ എതിരാളികളെ എല്ലാ മേഖലയിലും പിന്നിലാക്കിയാണ് കേരള ടീം ഒന്നാം സ്ഥാനം തിരിച്ച്പിടിച്ചത്.
കളിയുടെ 28ാം മിനിറ്റിൽ പ്രതിരോധനിരയിലെ നിഷുകുമാറും, 40ാം മിനിറ്റിൽ ഹർമാൻജോത് ഖാബ്ര എന്നിവരാണ് ഗോളുകൾ സ്കോർ ചെയ്തത്. ഖാബ്ര ഹീറോ ഓഫ് ദ മാച്ച് പുരസ്കാരം സ്വന്തമാക്കി. ടൂർണ്ണമെന്റിലെ അഞ്ചാമത്തെ വിജയമാണ് ബ്ലാസ്റ്റേഴ്സ് ആഘോഷിച്ചത്. ഇതോടെ 11 മത്സരത്തിൽ നിന്ന് കേരളത്തിന്റെ കൊമ്പന്മാർക്ക് 20 പോയിന്റായി. അഞ്ച് വീതം ജയവും സമനിലയും ഒരു പരാജയവുമാണ് ആണ് ബ്ലാസ്റ്റേഴ്സിന്റെ ഇതുവരെയുളള പ്രകടനം. 19 പോയിന്റുമായി ജംഷഡ്പൂരാണ് രണ്ടാം സ്ഥാനത്ത്.
