കൊച്ചി: പീഡന പരാതിയിൽ ആരോപണ വിധേയനായ ഐസിയു അഡ്മിൻ ശ്രീകാന്ത് വെട്ടിയാറിനെതിരെ ബലാത്സംഗക്കേസെടുത്തു. പത്തനംതിട്ട സ്വദേശിനിയുടെ പരാതിയിന്മേലാണ് കൊച്ചി സെൻട്രൽ പോലീസ് കേസടുത്തിരിക്കുന്നത്. പീഡനക്കുറ്റം ഉൾപ്പെടെ വിവിധ വകുപ്പുകൾ ചുമത്തിയാണ് ശ്രീകാന്ത് വെട്ടിയാറിനെതിരെ കേസെടുത്തതെന്നാണ് വിവരം.
കൊച്ചിയിലെ ഹോട്ടലിലും ആലുവയിലെ ഫ്ളാറ്റിലും വിളിച്ചുവരുത്തി പീഡിപ്പിച്ചുവെന്നാണ് പരാതി. 2021 ഫെബ്രുവരിയിലാണ് കേസിനാസ്പദമായ സംഭവം. ആലുവയിലെ ഫ്ളാറ്റിലേക്ക് പിറന്നാൾ ആഘോഷത്തിനായി ക്ഷണിക്കുകയും തുടർന്ന് ബലമായി പീഡിപ്പിച്ചുവെന്നും പരാതിയിൽ പറയുന്നു. സമാനമായ രീതിയിൽ എറണാകുളത്തെ ഫ്ളാറ്റിൽ വെച്ചും ഉപദ്രവിച്ചതായി യുവതി വ്യക്തമാക്കി.
സോഷ്യൽ മീഡിയയിൽ സ്ത്രീശാക്തീകരണത്തെക്കുറിച്ച് നിരവധി ചർച്ചകൾ നടത്തിയിരുന്ന വ്യക്തിയായിരുന്നതിനാൽ ശ്രീകാന്തിനോട് വലിയ ആരാധനയായിരുന്നു. ഇത് പിന്നീട് പരസ്പരം പരിചയപ്പെടുന്നതിലേക്കും സുഹൃത്തുക്കളാകുന്നതിലേക്കും നയിച്ചു. അതുകൊണ്ടാണ് പിറന്നാൾ ആഘോഷത്തിന് ക്ഷണിച്ചപ്പോൾ പോയതെന്നും യുവതി വെളിപ്പെടുത്തി.
അന്ന് ഭയം മൂലമാണ് പുറത്തുപറയാതിരുന്നത്. എന്നാൽ മറ്റ് പല സ്ത്രീകളും ഇത്തരം പ്രശ്നങ്ങൾക്ക് വിധേയരായെന്ന് അറിഞ്ഞതോടെയാണ് വിവരം പുറത്തുപറയാൻ തയ്യാറായതെന്നും പരാതിക്കാരി പറയുന്നു.
Comments