കൊറോണ മഹാമാരി ലോകത്ത് പടർന്ന് പിടിച്ചതിന് ശേഷം നമ്മുടെ ജീവതത്തിൽ ഒഴിച്ചു കൂടാനാവാത്ത ഒന്നായി മാറിയതാണ് മാസ്ക്. പണ്ട് ഹോസ്പിറ്റലുകളിൽ മാത്രം കണ്ട് പരിചയിച്ച സർജിക്കൽ മാസ്കിൽ നിന്ന് ഏറെ മാറ്റം വന്നുകഴിഞ്ഞു ഇന്ന് നാം ഉപയോഗിക്കുന്ന മാസ്ക്കുകൾക്ക്. മാസ്ക് ഇടുന്ന ആളുകൾക്കും വസ്ത്രത്തിനും സന്ദർഭങ്ങൾക്കും അനുസരിച്ച് മാസ്കിന്റെ പ്രത്യേകതകളിലും വിലയിലും മാറ്റം വരുന്നു. തുണിയുടെയും സർജിക്കൽ മാസ്കുകളോടുമൊപ്പം ലക്ഷക്കണക്കിന് രൂപയുടെ രത്നങ്ങൾ പതിപ്പിച്ച മാസ്കുകളും സ്വർണമാസ്കുകളും ഇന്ന് വിപണി കൈയ്യടക്കി കഴിഞ്ഞു.
ഓരോ ദിവസവും പുത്തൻ പരീക്ഷണങ്ങളാണ് മാസ്കുകളിൽ നടക്കുന്നത്. ബ്ലൂടൂത്ത് പിടിപ്പിച്ചമാസ്ക് വരെ വിപണിയിലെത്തികഴിഞ്ഞു. അക്കൂട്ടത്തിലേക്കിതാ വ്യത്യസ്തമായ ഒരു മാസ്ക് അവതരിപ്പിച്ചിരിക്കുകയാണ് കൊറിയൻ കമ്പനി.
മാസ്ക് ജീവിതത്തിലെ ഒഴിച്ചു കൂടാനാവാത്ത വസ്തു ആയ സ്ഥിതിക്ക് ഇനി ഭക്ഷണം കഴിക്കുമ്പോൾ പോലും മാസ്ക് മാറ്റേണ്ടതില്ല എന്നാണ് കമ്പനി പറയുന്നത്. ഭക്ഷണം കഴിക്കും മുമ്പ് മൂക്കിന് മുകളിലേക്ക് നീക്കിവെക്കും വിധത്തിലുള്ള ഡിസൈനാണ് പുത്തൻ മാസ്കിന്റേത്. ഭക്ഷണം കഴിക്കുമ്പോഴും വെള്ളം കുടിക്കുമ്പോഴുമൊക്കെ മാസ്ക് മുകളിലേയ്ക്ക് മാറ്റി വെയ്ക്കാം.
ദക്ഷിണ കൊറിയൻ കമ്പനിയായ അറ്റ്മാൻ ആണ് പുതിയ ‘സിമ്പിൾ ആൻഡ് ഹമ്പിൾ’ മാസ്കിന് പിന്നിൽ. കോസ്ക് എന്ന പേരിലാണ് കമ്പനി മാസ്ക് പുറത്തിറക്കിയിരിക്കുന്നത്. കൊറിയയിൽ മൂക്കിന് കോ എന്നാണ് പറയുന്നത്. അത് കൊണ്ട് കോ, മാസ്ക് എന്നീ പദങ്ങൾ യോജിപ്പിച്ചാണ് ഈ മാസ്കിന് കോസ്ക് എന്ന് നാമകരണം ചെയ്തിരിക്കുന്നത്.
പത്ത് മാസ്കുള്ള ഒരു പാക്കറ്റിന് 610 രൂപയാണ് കമ്പനി ഈടാക്കുന്നത്. നിരവധി പേരാണ് കമ്പനിയുടെ മാസ്ക് ഓർഡർ ചെയ്ത് കാത്തിരിക്കുന്നത്. അതേ സമയം മണ്ടൻ കണ്ടു പിടിത്തം എന്ന് പലരും കമ്പനിയുടെ മാസ്കിനെ വിശേഷിപ്പിക്കുന്നത്. വൈറസ് വായു വഴി പകരുമെങ്കിൽ മൂക്കിന് മുകളിൽ മാത്രം മാസ്ക് വെയ്ക്കുന്നതിന്റെ ഗുണമെന്നാണ് പലരും ചോദിക്കുന്നത്.
