ലക്നൗ: ഉത്തർപ്രദേശ് നിയമസഭാ തിരഞ്ഞെടുപ്പിന് മുന്നോടിയായി ബിജെപി പ്രകടനപത്രിക പുറത്തിറക്കി. ‘ ലോക് കല്ല്യാൺ സങ്കൽപ്പ് പത്ര’ എന്ന പേരിലാണ് ഇത് പുറത്തിറക്കിയത്. കേന്ദ്ര ആഭ്യന്തര മന്ത്രി അമിത് ഷാ, മുഖ്യമന്ത്രി യോഗി ആദിത്യനാഥ് എന്നിവർ ചേർന്നാണ് ഇത് പുറത്തിറക്കിയത്. സ്ത്രീകളുടെ ഉന്നമനം, യുവജന ശാക്തീകരണം, സാമൂഹിക-സാമ്പത്തിക വളർച്ച എന്നിവ ലക്ഷ്യമിട്ടുള്ള കാര്യങ്ങളാണ് പ്രകടന പത്രികയിൽ പ്രധാനമായും ഉൾപ്പെടുത്തിയിരിക്കുന്നത്. ലൗ ജിഹാദ് കേസില് പ്രതികളാകുന്നവര്ക്ക് 10 വർഷം തടവും ഒരു ലക്ഷം രൂപ പിഴയും ഉറപ്പാക്കുമെന്നും ഇതിൽ പറയുന്നു.
കർഷകർക്കായി ഉൾപ്പെടുത്തിയിരിക്കുന്ന പ്രധാന വാഗ്ദാനങ്ങൾ
* അടുത്ത അഞ്ച് വർഷത്തിനുള്ളിൽ കർഷകർക്ക് കൃഷി ആവശ്യങ്ങൾക്കായി സൗജന്യ വൈദ്യുതി. കുഴൽക്കിണറുകൾ, ജലസംഭരണികൾ, കിണറുകൾ എന്നിവ കുഴിക്കുന്നതിന് കർഷകർക്ക് ഗ്രാന്റായി 5000 കോടി. വല്ലഭഭായ് പട്ടേൽ അഗ്രി ഇൻഫ്രാസ്ട്രക്ചർ മിഷന്റെ കീഴിൽ കോൾഡ് സ്റ്റോറേജുകൾ, ഗോഡൗണുകൾ, സംസ്കരണ കേന്ദ്രങ്ങൾ എന്നിവ ഉണ്ടാക്കാൻ 25000 കോടി രൂപ. ഉരുളക്കിഴങ്ങ്, ഉള്ളി, തക്കാളി തുടങ്ങിയവയ്ക്ക് മിനിമം താങ്ങുവില ഉറപ്പാക്കും. സൗരോർജ്ജം മറ്റൊരു സ്രോതസ്സായി ഉപയോഗിക്കുന്ന കർഷകർക്ക് പ്രത്യേക അവാർഡ്. ആറ് മെഗാ ഫുഡ് പാർക്കുകൾ വികസിപ്പിക്കും.
സ്ത്രീകളുടെ ഉന്നമനത്തിന്
* മുഖ്യമന്ത്രിയുടെ കന്യാ സുമംഗല പദ്ധതി വഴി നൽകുന്ന സഹായം 25,000 രൂപയായി ഉയർത്തും. പാവപ്പെട്ട കുടുംബങ്ങളിലെ പെൺകുട്ടികളുടെ വിവാഹത്തിന് ഒരുലക്ഷം രൂപ ധനസഹായം. പ്രധാനമന്ത്രി ഉജ്ജ്വല യോജനയുടെ ഗുണഭോക്താക്കൾക്ക് സൗജന്യ എൽപിജി സിലിണ്ടറുകൾ. പെൺകുട്ടികളുടെ ശാക്തീകരണത്തിനായി റാണി ലക്ഷ്മിഭായി യോജനയുടെ കീഴിൽ സൗജന്യമായി സ്കൂട്ടറുകൾ വിതരണം ചെയ്യും. സ്ത്രീശാക്തീകരണത്തിനായി പുതിയ മൂന്ന് വനിത ബറ്റാലിയനുകൾ ആരംഭിക്കും.
വിദ്യാഭ്യാസത്തിനും യുവജന ശാക്തീകരണത്തിനും
* സ്വാമി വിവേകാനന്ദ് യുവ ശശക്തീകരൺ യോജനയുടെ ഭാഗമായി രണ്ട് കോടി ടാബ്ലെറ്റുകളും സ്മാർട്ട്ഫോണുകളും നൽകും. ബുണ്ടേൽഖണ്ഡിൽ റെക്കോർഡ് വേഗത്തിൽ ജനറൽ ബിപിൻ റാവത്ത് ഡിഫൻസ് ഇൻഡസ്ട്രിയൽ കോറിഡോർ പൂർത്തിയാക്കും. 30,000 സെക്കന്ററി സ്കൂളുകളിൽ സ്മാർട്ട് ക്ലാസ് റൂമുകൾ. ലൗ ജിഹാദ് കേസില് പ്രതികളാകുന്നവര്ക്ക് 10 വർഷം തടവും ഒരു ലക്ഷം രൂപ പിഴയും.
ആരോഗ്യം, തൊഴിൽ, ഭരണനിർവഹണം
* 30,000 കോടി രൂപ ചെലവിൽ ആറ് ധന്വന്തരി മെഗാപാർക്കുകൾ നിർമ്മിക്കും. എംഎസ്എംഇ മേഖലയിൽ ആറ് ഇൻഡസ്ട്രിയൽ പാർക്കുകൾ. ലതാ മങ്കേഷ്കർ പെർഫോമിങ് ആർട് ഗാലറി സ്ഥാപിക്കും.
2017ൽ ബിജെപി ജനങ്ങൾക്ക് മുന്നിൽ വച്ച 117 വാഗ്ദാനങ്ങളിൽ 92 ശതമാനവും പാലിച്ചുവെന്ന് ചടങ്ങിൽ അമിത് ഷാ വ്യക്തമാക്കി. ‘2030 ആകുമ്പോഴേക്കും ഉത്തർപ്രദേശിനെ രാജ്യത്തെ തന്നെ ഒന്നാം നമ്പർ സംസ്ഥാനമാക്കി മാറ്റാനുള്ള പ്രവർത്തനങ്ങളാണ് ഡബിൾ എൻജിൻ സർക്കാർ നടത്തിയത്. ഇത് വെറും പ്രകടന പത്രികയല്ല. ഇവിടുത്തെ ജനങ്ങൾക്ക് മുന്നിൽ ബിജെപിയുടെ യുപി സഖ്യം നടത്തുന്ന പ്രതിജ്ഞയാണ്. അഞ്ച് വർഷം മുൻപ് പ്രകടനപത്രികയിൽ പറഞ്ഞിരുന്ന 92 ശതമാനം കാര്യങ്ങളും ഈ സർക്കാർ പൂർത്തിയാക്കിയെന്നും’ അദ്ദേഹം പറഞ്ഞു.
Comments