ദുബായ് : ജീവിത നിലവാരവും വിദ്യാർത്ഥികളുടെ ക്ഷേമവും മെച്ചപ്പെടുത്താൻ രക്ഷിതാക്കൾക്കായി പുതിയ ഓൺലൈൻ സർവ്വേയുമായി യുഎഇ വിദ്യാഭ്യാസ മന്ത്രാലയം. സ്കൂളുകളിൽ അക്കാദമിക് നിലവാരം മികവുറ്റതാക്കുന്നതൊടൊപ്പം പ്രൊഫഷണൽ രംഗത്ത് കൂടുതൽ വിജയത്തിലേക്ക് നയിക്കുന്ന ഘടകങ്ങളെക്കുറിച്ച് കൂടുതൽ അറിയുകയുമാണ് സർവ്വേയിലൂടെ ലക്ഷ്യമിടുന്നത്. പുതിയ ഓൺലൈൻ സർവ്വേയിൽ പങ്കെടുക്കാനും അവരുടെ അഭിപ്രായങ്ങൾ പങ്കുവെക്കാനും രക്ഷിതാക്കളോട് വിദ്യാഭ്യാസ മന്ത്രാലയം അഭ്യർത്ഥിച്ചു.
ജീവിത നിലവാരവും വിദ്യാർത്ഥികളുടെ ക്ഷേമത്തെക്കുറിച്ചുമുള്ളള്ള ഉൾക്കാഴ്ച നൽകുകയെന്ന ലക്ഷ്യത്തോടെയാണ് യുഎഇ വിദ്യാഭ്യാസ മന്ത്രാലയം ഓൺലൈൻ സർവ്വേ നടത്തുന്നത്. സർവ്വേയിലൂടെ ലഭിക്കുന്ന വിവരങ്ങളുടെ അടിസ്ഥാനത്തിൽ സ്കൂളുകളുടെ പഠന , പാഠ്യേതര രീതികളിൽ മാറ്റം വരുത്തും. പ്രൊഫഷണൽ രംഗത്ത് വിജയിക്കാൻ വിദ്യാർഥികളെ പ്രാപ്തരാക്കുന്നതിൽ സ്കൂളുകൾക്ക് പുതിയ വിവരങ്ങൾ ഗുണകരമാകുമെന്നാണ് വിലയിരുത്തൽ.
വിദ്യാർത്ഥിയുടെ ജീവിത നിലവാരം ഉറപ്പാക്കുന്നതിൽ രക്ഷിതാക്കൾക്കുള്ള പങ്ക് എന്ന പേരിൽ ഇതിനോടകം ചോദ്യാവലി പുറത്തിറക്കിയെന്നും മന്ത്രാലയം വ്യക്തമാക്കി. വിദ്യാർത്ഥികളുടെ വ്യക്തിപരമായ കാഴ്ചപ്പാടുകളും പ്രൊഫഷണൽ രംഗത്തോടുള്ള സമീപനങ്ങളും രക്ഷിതാക്കളിലൂടെ അറിയാൻ സാധിക്കും. പ്രചോദനവും ആഗോളവുമായ സുപ്രധാനമായ സംരഭങ്ങൾ വിഭാവനം ചെയ്യാനാണ് യുഎഇ യിലെ വിദ്യാഭ്യാസ സ്ഥാപനങ്ങൾ ശ്രമിക്കുന്നതെന്നും അധികൃതർ വ്യക്തമാക്കി.
വിദ്യാർത്ഥികളെ ശാസ്ത്രീയമായി സമ്പന്നമാക്കുന്ന പാഠ്യപദ്ധതികളും വിവിധ ഉപകരണങ്ങളും ഉൾപ്പെടുന്ന അക്കാദമിക് രീതിക്ക് പുറമെ വ്യക്തിത്വത്തെ രൂപപ്പെടുത്തുന്ന ഇടമായി സ്കൂളുകളെ മാറ്റേണ്ടതിന്റെ ആവശ്യകതയെക്കുറിച്ചും മന്ത്രാലയം വിശദീകരിച്ചു. ഒദ്യോഗിക വെബ്സൈറ്റിലുള്ള അപ്ലോഡ് ചെയ്ത ചോദ്യാവലിയിലൂടെ അഭിപ്രായങ്ങൾ പങ്കുവെക്കാൻ രക്ഷിതാക്കളോട് വിദ്യാഭ്യാസ മന്ത്രാലയം അഭ്യർത്ഥിച്ചു.
Comments