പാലക്കാട്: ബാബുവിനെതിരെ കേസെടുക്കില്ലെന്ന് വനംമന്ത്രി എ.കെ ശശീന്ദ്രൻ. നടപടി പാടില്ലെന്ന് മുഖ്യവനപാലകന് മന്ത്രി എ.കെ ശശീന്ദ്രൻ നിർദ്ദേശം നൽകി. മുഖ്യമന്ത്രി പിണറായി വിജയനോട് ഇക്കാര്യം അറിയിച്ചിട്ടുണ്ടെന്നും പൊതുസമൂഹത്തിനൊപ്പമാണ് സർക്കാരെന്നും മന്ത്രി വ്യക്തമാക്കി. ഒരുകൊല്ലം വരെ തടവോ പിഴയോ ലഭിക്കാവുന്ന കുറ്റമാണ് വനംവകുപ്പ് ചുമത്താനിരുന്നത്. കേരള ഫോറസ്റ്റ് ആക്ട് സെഷൻ 27 പ്രകാരം കേസെടുക്കാനാണ് വനംവകുപ്പിന്റെ നീക്കം.
പ്ലസ് ടൂ വിദ്യാർത്ഥിയും ഒൻപതാം ക്ലാസ് വിദ്യാർത്ഥിയുമാണ് ബാബുവിനൊപ്പം മലകയറിയത്. കേസെടുക്കുന്നതിന് മുൻപായി വാളയാർ സെഷൻ ഓഫീസർ ബാബുവിനെ കണ്ട് മൊഴിയെടുക്കാൻ തീരുമാനിച്ചിരുന്നു. ഒപ്പമുണ്ടായിരുന്ന സുഹൃത്തുക്കൾക്കെതിരെ കേസെടുക്കുന്നതിൽ മൊഴിയെടുത്ത ശേഷം തീരുമാനം എടുക്കുമെന്നും വനംവകുപ്പ് അറിയിച്ചു. പിന്നാലെയാണ് കേസെടുക്കരുതെന്ന് മന്ത്രി നിർദ്ദേശിച്ചത്.
അതേസമയം ബാബുവിന്റെ ആരോഗ്യനില തൃപ്തികരമാണെന്ന് ആശുപത്രി അധികൃതർ അറിയിച്ചിട്ടുണ്ട്. ജില്ലാ ആശുപത്രിയിലെ നിരീക്ഷണ വാർഡിലാണ് നിലവിൽ ബാബു. ആന്തരികാവയവങ്ങൾക്ക് ക്ഷതമേറ്റിട്ടില്ലെന്നാണ് പരിശോധനകളിൽ നിന്നും വ്യക്തമാകുന്നത്. വീഴ്ച്ചയിലുണ്ടായ പരിക്കുകൾ സാരമുള്ളതല്ല. ദ്രവരൂപത്തിലുള്ള ഭക്ഷണമാണ് നിലവിൽ നൽകുന്നത്. ഉച്ചയോടെ ആരോഗ്യനില പൂർണ്ണമായും തൃപ്തികരമാകുമെന്ന പ്രതീക്ഷയിലാണ് ആശുപത്രി അധികൃതർ.
