തിരുവനന്തപുരം: കേരളത്തിലെ പ്രധാന ട്രെക്കിങ് റൂട്ടുകളിലൊന്നായ അഗസ്ത്യാർകൂടം യാത്രയ്ക്കുള്ള വിലക്ക് നീക്കി. ഇന്ന് മുതൽ ഓൺലൈൻ ബുക്കിങ് പുനരാരംഭിച്ചു. കൊറോണ രൂക്ഷമായ സാഹചര്യത്തിലാണ് അഗസ്ത്യാർകൂടം ട്രെക്കിങ്ങിനുള്ള ബുക്കിങ് താത്കാലികമായി നിർത്തിവച്ചത്. നിയന്ത്രണങ്ങളിൽ ഇളവ് വന്ന സാഹചര്യത്തിലാണ് ബുക്കിങ് വീണ്ടും പുനരാരംഭിച്ചത്.
ഫെബ്രുവരി 11 മുതൽ 26 വരെയുള്ള ദിവസങ്ങളിൽ 25 പേർക്ക് കൂടി ഓൺലൈൻ ബുക്കിങ് നടത്താം. യാത്രയ്ക്ക് താത്പര്യപ്പെടുന്നവർക്ക് www.forest.gov.in എന്ന വനംവകുപ്പിന്റെ ഔദ്യോഗിക വെബ്സൈറ്റിലോ serviceonline.gov.in/trekking എന്ന വെബ്സൈറ്റിലോ ഇന്ന് രാവിലെ 11 മണി മുതൽ ടിക്കറ്റ് ബുക്ക് ചെയ്യാം. ഇവിടേക്കെത്തുന്ന സഞ്ചാരികൾ കൊറോണ മാനദണ്ഡം കർശനമായി പാലിക്കണമെന്നും നിർദ്ദേശമുണ്ട്.
വർഷത്തിലൊരിക്കൽ മാത്രമാണ് കർശന നിയന്ത്രണങ്ങളോടെ പൊതുജനങ്ങൾക്ക് ഇവിടേക്ക് പ്രവേശനം അനുവദിക്കുന്നത്. 27 കിലോമീറ്റർ നടന്നാണ് ഏറ്റവും മുകളിലെത്തേണ്ടത്. സമുദ്രനിരപ്പിൽ നിന്ന് 6200 അടി ഉയരത്തിലാണ് അഗസ്ത്യാർകൂടം സ്ഥിതി ചെയ്യുന്നത്.
