ലോകത്തിലെ ഏറ്റവും വലുതും വിലപിടിപ്പുള്ളതുമായ ബ്ലാക്ക് ഡയമണ്ട് ‘ ദ എനിഗ്മ ‘ യുടെ വിൽപ്പന നടത്തി. ലോകപ്രശസ്ത രത്‌ന ലേല കമ്പനിയായ സതബീസാണ് ഇതിന്റെ വിൽപ്പന നടത്തിയത്. 4.3 മില്ല്യൺ ഡോളർ അതായത് 32 കോടി രൂപയ്‌ക്കാണ് ഇതിന്റെ വിൽപ്പന നടത്തിയത്. ക്രിപ്‌റ്റോ കറൻസി വഴിയാണ് വിൽപ്പന നടന്നത്. അതേസമയം രത്‌നം വാങ്ങിയ ആളുടെ വിവരങ്ങൾ ഒന്നും തന്നെ പുറത്ത് വിട്ടിട്ടില്ല. 555.55 കാരറ്റിന്റെ ബ്ലാക്ക് ഡയമണ്ടാണിത്. 55 വശങ്ങളുമുണ്ട്.
എനിഗ്മ ഭൂമിക്ക് പുറത്ത് നിന്ന് എത്തിച്ചേർന്നതാണെന്നാണ് വിലയിരുത്തൽ. ഉൽക്കകൾ തമ്മിൽ കൂട്ടിയിടിച്ചോ, ഛിന്നഗ്രഹങ്ങളുമായുണ്ടായ കൂട്ടിയിടി മൂലമോ ഇത് ഭൂമിയിൽ പതിച്ചതാകാമെന്നാണ് നിഗമനം. അത്യപൂർവ്വമായ ബ്ലാക്ക് ഡയമണ്ട് ആണിതെന്ന് വിദഗ്ധരും ചൂണ്ടിക്കാണിക്കുന്നു. 55 കോടി ഡോളറാണ് ഇതിന് വിലയായി ആദ്യം നിശ്ചയിച്ചിരുന്നത്. 100 കോടി വർഷമെങ്കിലും ഇതിന് പഴക്കം കണക്കാക്കുന്നുണ്ട്.
ഭൂമിയിൽ വച്ച് കട്ട് ചെയ്ത വജ്രങ്ങളിൽ ഏറ്റവും വലുതായി കണക്കാക്കപ്പെടുന്ന രത്‌നമാണ് എനിഗ്മ. ബ്രൗൺ കലർന്ന കറുപ്പ് നിറമാണ് ഇതിന്റെ മറ്റൊരു പ്രത്യേകത. കാർബണാഡോ എന്ന വജ്രവിഭാഗത്തിലാണ് ഇത് പെടുന്നത്. ബ്രസീൽ, ആഫ്രിക്ക തുടങ്ങിയ രാജ്യങ്ങളിലാണ് കാർബണാഡോ ശ്രേണിയിലുള്ള വജ്രങ്ങൾ കൂടുതലായി കണ്ടെത്തിയിട്ടുള്ളത്.
ഇന്റർസ്റ്റെല്ലാർ സ്പേസിൽ നൈട്രജൻ, ഹൈഡ്രജൻ മൂലകങ്ങളുടെ മിശ്രിതമായി ഇവ രൂപപ്പെട്ടതാണെന്നും കരുതുന്നുണ്ട്. ഉൽക്കാശിലകളിൽ അടങ്ങിയിരിക്കുന്ന ഓസ്ബോണൈറ്റ് എന്ന ധാതു ഇതിൽ അടങ്ങിയിട്ടുണ്ടെന്നും പഠനങ്ങൾ തെളിയിക്കുന്നു. ബെൽജിയത്തിലെ ഒരു വ്യക്തിയുടെ സ്വകാര്യ കളക്ഷനിൽ നിന്നാണ് വജ്രം തങ്ങൾക്ക് ലഭിച്ചതെന്ന് സതബീസ് പറയുന്നു. 2004ലാണ് 55 വശങ്ങളുള്ള രീതിയിൽ ഇത് മുറിച്ചതെന്ന് കണക്കാക്കപ്പെടുന്നു.
Comments