ആലപ്പുഴ : പോപ്പുലർ ഫ്രണ്ട് ഭീകരർ അരുംകൊല ചെയ്ത ബിജെപി നേതാവ് രൺജീത് ശ്രീനിവാസന്റെ വീട് സന്ദർശിച്ച് ഗോവ ഗവർണ്ണർ പി.എസ്.ശ്രീധരൻ പിള്ള. പത്തനംതിട്ടയിലെ പരുമലയിൽ ഔദ്യോഗിക പരിപാടികളിൽ പങ്കെടുത്ത് മടങ്ങവെയാണ് അദ്ദേഹം രൺജീത്ത് ശ്രീനിവാസന്റെ വീട്ടിൽ എത്തിയത്. കുടുംബത്തെ ആശ്വസിപ്പിച്ച് പൂർണ്ണ പിന്തുണ വാഗ്ദാനം ചെയ്താണ് അദ്ദേഹം മടങ്ങിയത്.
രൺജീത്തിന്റെ അമ്മയും ഭാര്യയുമായാണ് അദ്ദേഹം സംവദിച്ചത്. സംഭാഷണം ഏറെ നേരം നീണ്ടു. രൺജീത്തുമായി വളരെക്കാലത്തെ ബന്ധമുണ്ടെന്ന് ഗോവ ഗവർണർ മാദ്ധ്യമങ്ങളോട് പറഞ്ഞു.
പൊതു പ്രവർത്തകൻ, അഭിഭാഷകൻ എന്നീ നിലകളിൽ അടുത്ത ബന്ധമുണ്ട്. സുഹൃത് ബന്ധത്തിന്റെ അടിസ്ഥാനത്തിലാണ് ഇവിടെ എത്തിയത്. അദ്ദേഹത്തിന്റെ നിര്യാണത്തിൽ അനുശോചനം രേഖപ്പെടുത്തിയിരുന്നു. രൺജീത്തിന്റെ കൊലപാതകം ദൗർഭാഗ്യകരമാണെന്നും അദ്ദേഹം പ്രതികരിച്ചു.
ഗവർണറുടെ സന്ദർശനത്തോടനുബന്ധിച്ച് പ്രദേശത്ത് കനത്ത സുരക്ഷ ആയിരുന്നു പോലീസ് ഒരുക്കിയിരുന്നത്.ബിജെപി ജില്ലാ അദ്ധ്യക്ഷൻ എം ബി ഗോപകുമാർ അടക്കമുള്ള നേതാക്കൾ ഗവർണറെ അനുഗമിച്ചു.
Comments