ന്യൂഡൽഹി : യുഎൻ ദൗത്യ സംഘത്തിലെ സ്ത്രീ പ്രാതിനിധ്യം വർദ്ധിപ്പിച്ച് ഇന്ത്യ. യുണൈറ്റഡ് നേഷൻസ് സെലക്ഷൻ അസിസ്റ്റൻസ് ആന്റ് അസെസ്മെന്റ് ടീമിന്റെ പുതുതായി തയ്യാറാക്കിയ പട്ടികയിൽ 25 ശതമാനം സ്ത്രീകളാണ്. 69 അംഗങ്ങളുള്ള പട്ടികയിൽ 19 പേരും വനിതാ പോലീസ് ഉദ്യോഗസ്ഥരാണ്.
2022 മുതൽ 2024 വരേയുള്ള ദൗത്യ സംഘത്തിന്റെ പട്ടികയാണ് തയ്യാറാക്കിയിരിക്കുന്നത്. ഇതിൽ പോലീസ് ഉദ്യോഗസ്ഥർക്ക് പുറമേ അർദ്ധ സൈനിക ഉദ്യോഗസ്ഥരും ഉൾപ്പെടുന്നു. ഇന്ത്യ നേതൃത്വം നൽകുന്ന അഞ്ച് ദൗത്യങ്ങളാണ് ഇവർ പൂർത്തീകരിക്കുക. ഇതിൽ ദക്ഷിണ സുഡാൻ, സൈപ്രസ്, മാലി എന്നീ രാജ്യങ്ങളിലെ ദൗത്യങ്ങളും ഉൾപ്പെടുന്നു.
നേരത്തെ 264 പേരെയാണ് ദൗത്യത്തിനായി കേന്ദ്ര ആഭ്യന്തര മന്ത്രാലയം നിയോഗിച്ചിരുന്നത്. എന്നാൽ പിന്നീട് യുഎന്നിന്റെ നിർദ്ദേശ പ്രകാരം ഇത് 150 ആക്കി കുറയ്ക്കുകയായിരുന്നു. ജനുവരി 31 മുതൽ ഫെബ്രുവരി വരെ നടന്ന മിഷൻ അസെസ്മെന്റിൽ 127 പേർ പങ്കെടുത്തു. ഇതിൽ നിന്നുമാണ് 69 പേരുടെ അന്തിമ പട്ടിക തയ്യാറാക്കിയത്. അന്തിമ പട്ടികയിൽ ഉൾപ്പെട്ടിട്ടുള്ളവർക്ക് ആയുധങ്ങൾ കൈകാര്യം ചെയ്യുന്നതിനുൾപ്പെടെ പരിശീലനങ്ങൾ നൽകിയിട്ടുണ്ട്.
