ബെർലിൻ: പുതുപുത്തൻ പോർഷെ കാറുകൾ കയറ്റി വന്ന കാർഗോയ്ക്ക് തീപിടിച്ചു. ജർമ്മനിയിലെ എംഡനിൽ നിന്നും യുണൈറ്റഡ് സ്റ്റേറ്റ്സിലെ റോഡ് ഐലൻഡിലേയ്ക്കുള്ള യാത്രാമദ്ധ്യേയാണ് കാർഗോയ്ക്ക് തീപിടിച്ചത്.
അറ്റ്ലാന്റിക് സമുദ്രത്തിന്റെ നടുവിലെത്തിയപ്പോൾ കപ്പലിൽ നിന്നും അപായമണി മുഴങ്ങിയതായി കപ്പലിലെ ജീവനക്കാർ പറഞ്ഞു. അലാറം കേട്ട് സമുദ്രത്തിൽ പട്രോളിംഗ് നടത്തുകയായിരുന്ന പോർച്ചുഗീസ് നാവികസേന ഉദ്യോഗസ്ഥരാണ് തീയണച്ച് ഒരു വൻ ദുരന്തം ഒഴിവാക്കിയത്. നാവികസേനയ്ക്ക് പുറമെ, പോർച്ചുഗീസ് വ്യോമസേന ഉദ്യോഗസ്ഥരും രക്ഷാപ്രവർത്തനങ്ങളിൽ ഏർപ്പെട്ടിരുന്നു എന്ന് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്തു.
കാർഗോയിലെ 22ഓളം ജീവനക്കാരെ സുരക്ഷിതമായി കരയിൽ എത്തിച്ചു. കാർഗോയിലുണ്ടായിരുന്ന കാറുകളുടെ കാര്യത്തിൽ ഇനിയും വ്യക്തത ലഭിച്ചിട്ടില്ല. സംഭവത്തെ കുറിച്ചുള്ള മറ്റ് വിവരങ്ങൾ ഉടൻ അറിയിക്കുമെന്നും അന്താരാഷ്ട്ര മാദ്ധ്യമങ്ങൾ അറിയിച്ചു.
പോർഷെ കാറുകൾക്ക് പുറമെ, ഫോക്സ് വാഗണിന്റെ വാഹനങ്ങളും കാർഗോയിലുണ്ടായിരുന്നു. അപകടത്തെ തുടർന്ന് ഉപഭോക്താക്കൾക്ക് അവർ ബുക്ക് ചെയ്ത വാഹനം ലഭിക്കാൻ കാലതാമസം നേരിടും. ഇതിൽ ക്ഷമ ചോദിക്കുന്നുവെന്ന് വാഹന നിർമ്മാതാക്കളും കാർഗോ അധികൃതരും അറിയിച്ചു.
Comments