മോഹൻലാലിനെ നായകനാക്കി ബി ഉണ്ണിക്കൃഷ്ണൻ ഒരുക്കിയ നെയ്യാറ്റിൻകര ഗോപന്റെ ആറാട്ട് തീയേറ്ററിൽ എത്തിയിരിക്കുകയാണ്. ഒരു മാസ് എന്റർടെയ്നറാണ് പ്രേക്ഷകർക്കായി ഒരുക്കിയിരിക്കുന്നതെന്ന് സംവിധായകനും മോഹൻലാലും നേരത്തെ അറിയിച്ചിരുന്നു. ഇത് ശരിവെയ്ക്കുന്ന തരത്തിലുള്ള പ്രതികരണമാണ് തീയേറ്റിൽ നിന്നും പുറത്തുവരുന്നത്. പഴയ ലാലേട്ടനെ തിരിച്ചു കിട്ടിയെന്നാണ് ആരാധകർ ഒന്നടങ്കം പറയുന്നത്.
ചിത്രത്തിന്റെ രണ്ടാം പകുതിയിൽ ഒരു സസ്പെൻസ് മാറ്റിവെച്ചിരിക്കുന്നുവെന്നാണ് പ്രേക്ഷകർ പറയുന്നത്. വലിയ ആഘോഷത്തോടെ ആരാധകർ ചിത്രം ഏറ്റെടുത്തെന്നാണ് തീയേറ്ററിലെ ആളുകളുടെ പ്രതികരണത്തിൽ നിന്നും വ്യക്തമാകുന്നത്. പുലിമുരുകന്റെ തിരക്കഥ ഒരുക്കിയ ഉദയ്കൃഷ്ണ തന്നെയാണ് ആറാട്ടിന് പിന്നിലും. ലോകമെമ്പാടുമുള്ള 2700 സ്ക്രീനുകളിലാണ് ആറാട്ട് പ്രദർശനത്തിനെത്തിയത്. കേരളത്തിൽ മാത്രം 522 സ്ക്രീനുകളിലാണ് ചിത്രം പ്രദർശിപ്പിച്ചിരിക്കുന്നത്.
ഒരു പ്രത്യേക ചുമതല നിർവ്വഹിക്കുന്നതിനായി നെയ്യാറ്റിൻകരയിൽ നിന്നും പാലക്കാട്ടെ ഒരു ഗ്രാമത്തിൽ ഗോപൻ എത്തുന്നതും തുടർന്നുള്ള സംഭവങ്ങളുമാണ് ചിത്രത്തിന്റെ പ്രമേയം. 18 കോടി ബഡ്ജറ്റിലാണ് ചിത്രം നിർമ്മിച്ചിരിക്കുന്നത്. ശ്രദ്ധ ശ്രീനാഥ് ആണ് ചിത്രത്തിൽ നായികയായി എത്തുന്നത്. നടൻ നെടുമുടി വേണു, സായ് കുമാർ, സിദ്ദിഖ്, വിജയരാഘവൻ, ജോണി ആന്റണി, ഇന്ദ്രൻസ്, രാഘവൻ, ഷീല, സ്വാസിക, തുടങ്ങി നിരവധി താരങ്ങൾ ചിത്രത്തിലുണ്ട്.
