തുടർച്ചയായ അഞ്ചാം വാരത്തിലും മികച്ച പ്രതികരണവുമായി പ്രണവ് മോഹൻലാൽ ചിത്രം ‘ഹൃദയം’ പ്രദർശനം തുടരുകയാണ്. ജനുവരി 21ന് തീയറ്ററുകളിൽ എത്തിയ ചിത്രത്തെ നിറഞ്ഞ കയ്യടികളോടെയാണ് പ്രേക്ഷകർ സ്വീകരിച്ചത്. വിനീതിന്റെ സംവിധാനത്തെയും, പ്രണവിന്റെ അഭിനയ മികവിനെയും പുകഴ്ത്തി ധാരാളം ആളുകളാണ് രംഗത്തെത്തിയത്. ചിത്രം അഞ്ചാം വാരത്തിലേയ്ക്ക് കടന്ന അവസരത്തിൽ പ്രേക്ഷകർക്ക് നന്ദി അറിയിച്ചിരിക്കുകയാണ് പ്രണവ് മോഹൻലാൽ.
‘ ഇന്ത്യയിലെമ്പാടുമുള്ള തീയറ്ററുകളിൽ ഹൃദയം പ്രദർശനം തുടരുകയാണ്. നിങ്ങളുടെ അകമഴിഞ്ഞ സ്നേഹത്തിനും, പിന്തുണയ്ക്കും നന്ദി’ പ്രണവ് മോഹൻലാൽ ഫേസ്ബുക്കിൽ കുറിച്ചു. പോസ്റ്റിന് ആശംസകളുമായി ധാരാളം ആളുകളാണ് രംഗത്തെത്തിയത്. കഴിഞ്ഞ ദിവസമാണ് ചിത്രം ഒടിടിയിൽ റിലീസ് ചെയ്തത്. ഡിസ്നി പ്ലസ് ഹോട്ട്സ്റ്റാറിലാണ് ചിത്രം റിലീസായത്. പൃഥ്വിരാജിന്റെ ബ്രോ ഡാഡിയ്ക്ക് ശേഷം ഡിസ്നി പ്ലസിൽ എത്തുന്ന രണ്ടാമത്തെ ചിത്രമാണ് ഹൃദയം.
അഞ്ച് വർഷത്തെ ഇടവേളയ്ക്ക് ശേഷം വിനീത് ശ്രീനിവാസന്റെ സംവിധാനത്തിൽ എത്തിയ ചിത്രമാണ് ഹൃദയം. പ്രണവിന് പുറമെ കല്യാണി പ്രിയദർശൻ, ദർശന തുടങ്ങിയവരാണ് ചിത്രത്തിൽ പ്രധാന വേഷങ്ങളായി എത്തിയത്. മെറിലാൻഡ് സിനിമാസിന്റെ ബാനറിൽ വിശാഖ് സുബ്രഹ്മണ്യമാണ് ചിത്രം നിർമ്മിച്ചിരിക്കുന്നത്.
Comments