അത്യധികം ഭാഗ്യവാനായ ഒരു യുവാവിന്റെ വീഴ്ചയുടെ ദൃശ്യങ്ങളാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്. വീണ് ‘തണ്ടലൊടിയേണ്ട’ സാഹചര്യത്തിൽ നിന്നും ഒരു പോറൽ പോലുമേൽക്കാതെ രക്ഷപ്പെടുന്നതാണ് വീഡിയോ. സംഭവത്തിന്റെ സിസിടിവി ദൃശ്യങ്ങളാണ് വൈറലായിരിക്കുന്നത്.
ഫോൺ നോക്കി നടന്നാൽ കെട്ടിമറിഞ്ഞുവീഴാൻ സാധ്യതയുണ്ടെന്ന് എല്ലാവർക്കുമറിയാം.. എന്നാൽ ചിലപ്പോഴൊക്കെ പരിസരം മറന്ന്, ഫോൺ നോക്കി പലരും നടക്കാറുണ്ട്. എവിടെയെങ്കിലും ചെന്ന് തട്ടിനിൽക്കുമ്പോഴോ, മുന്നിലുള്ള വസ്തുവിൽ തട്ടി വീഴാൻ പോകുമ്പോഴോ ആയിരിക്കും ഇത്തരക്കാർ ബോധം വീണ്ടെടുക്കുന്നത്. ഇത്തരത്തിൽ ഫോൺ നോക്കി നടന്ന യുവാവാണ് ഈ വീഡിയോയിലെ താരം.
നൂറുകണക്കിനാളുകൾ വന്നുപോകുന്ന ഒരു മാളിലാണ് സംഭവമുണ്ടായത്. മാളിലെ സ്റ്റോർ റൂമിലേക്ക് പെട്ടികൾ മാറ്റിക്കൊണ്ടിരിക്കുകയായിരുന്നു തൊഴിലാളികൾ. തൊട്ടുതാഴത്തെ നിലയിലേക്കാണ് പെട്ടികൾ മാറ്റുന്നത്. അതിനായി മുകളിലെ നിലയിൽ നിന്നും ഗർത്തമുണ്ട്. ഈ ഗർത്തം വഴിയാണ് പെട്ടികൾ താഴേക്ക് എത്തിക്കുന്നത്.
ഇതിനിടെയാണ് നിലത്ത് നോക്കാതെ ഫോൺ നോക്കി യുവാവ് നടന്നുവന്നിരുന്നത്. വരുന്ന വഴിയിൽ സ്റ്റോർ റൂമിലേക്കുള്ള വലിയ ഗർത്തം യുവാവ് കാണുന്നില്ല. യുവാവ് നടന്നുവരുന്നത് തൊഴിലാളികളും ശ്രദ്ധിച്ചില്ല.
ഇതോടെ ദേ പോകുന്നു താഴേക്ക്.. അടിയിലെ സ്റ്റോർ റൂമിലേക്ക് തലകുത്തി വീണിരിക്കുമെന്നാണ് പ്രതീക്ഷിക്കുകയെങ്കിലും യുവാവിനെ ഭാഗ്യം തുണച്ചു. സ്റ്റോർ റൂമിൽ പെട്ടികൾ നിരത്തി വെച്ചിട്ടുണ്ട്. ഇത്തരത്തിൽ ഒന്നിന് മുകളിൽ ഒന്നായി കയറ്റിവെച്ച പെട്ടികൾക്ക് മുകളിൽ ചെന്നിരിക്കുന്ന നിലയിലാണ് യുവാവ് വീണത്. സേഫ് ലാൻഡിങ്..
CCTV footage in Turkey captured images of a young man, distracted by his phone, falling into a storage hole and being saved by a pile of boxes | https://t.co/sgG3VpKUFO pic.twitter.com/4uOFlxHOgc
— RTÉ News (@rtenews) February 17, 2022
എന്താണിപ്പോൾ സംഭവിച്ചതെന്നറിയാതെ ഒരു നിമിഷം പകച്ചുനിന്ന യുവാവ്, പിന്നീട് കയ്യുംവീശി സ്റ്റോർ റൂമിൽ നിന്നും നടന്നു പോയി. വെറും 27 സെക്കൻഡ് മാത്രം ദൈർഘ്യമുള്ള വീഡിയോ ദൃശ്യങ്ങൾ ലക്ഷക്കണക്കിന് പേരാണ് കണ്ടത്. തുർക്കിയിലെ മദ്ധ്യ ഇസ്താംബൂളിലെ മാളിൽ കഴിഞ്ഞ തിങ്കളാഴ്ചയാണ് സംഭവമുണ്ടായത്. ഈ ആഴ്ചയിലെ ഏറ്റവും മികച്ച ഭാഗ്യവാൻ എന്നാണ് ഈ വീഡിയോ ദൃശ്യങ്ങളോട് കാഴ്ചക്കാർ പ്രതികരിച്ചത്.
