ലഖ്നൗ//ഛണ്ഡിഗഡ്: യുപി നിയമസഭാ തിരഞ്ഞെടുപ്പ് മൂന്നാംഘട്ടത്തില് 16 ജില്ലകളിലായി 59 സീറ്റുകളിലേക്കാണ് ഇന്ന് തിരഞ്ഞെടുപ്പ് നടന്നത്. പഞ്ചാബില് ഒറ്റഘട്ടമായി നടന്ന തിരഞ്ഞെടുപ്പില് 117 നിയമസഭാ മണ്ഡലത്തിലേക്ക് തീപാറുന്ന പോരാട്ടം നടന്നു. യുപിയില് യോഗിയുടെ നേതൃത്വത്തില് ഭാരതീയ ജനതാപാര്ട്ടിയും അഖിലേഷ് യാദവിന്റെ നേതൃത്വത്തില് സമാജ്വാദിപാര്ട്ടിയും തമ്മിലാണ് പ്രധാനപോരാട്ടം.
എന്നാല് പഞ്ചാബില് ത്രികോണമത്സരമാണ് നടക്കുന്നത്. ബിജെപി, കോണ്ഗ്രസ്, ആംആദ്മി പാര്ട്ടി ചേര്ന്ന് കനത്ത മത്സരമാണ് സംസ്ഥാനത്ത് നടന്നത്. ആംആദ്മി പാര്ട്ടി ഇത്തവണ ശക്തമായ മത്സരമാണ് കാഴ്ചവച്ചത്. ത്രികോണ മത്സരം നടന്ന പഞ്ചാബില് ഇന്നത്തോടെ പോളിങ് സമാപിച്ചു. യുപിയില് മാര്ച്ച് ഏഴിനാണ് സമാപനം. മാര്ച്ച് പത്തിന് മുഴുവന് സ്റ്റേറ്റുകളുടെയും ഫലം പുറത്തുവരും. പഞ്ചാബില് 63.44 ശതമാനം പോളിങ്ങാണ് അഞ്ച് മണിവരെ നടന്നത്. യുപിയില് ഇത് 57.43 ശതമാനമായിരുന്നു. പഞ്ചാബ് 73.45 ശതമാനം വോട്ട് രേഖപ്പെടുത്തിയ മാന്സ നിയോജകമണ്ഡലത്തിലാണ് ഏറ്റവും ഉയര്ന്നപോളിങ് രേഖപ്പെടുത്തിയത്. 72.84 ശതമാനം പോളിങ്ങ് നടന്ന മലേര്കോട്ലയാണ് തൊട്ടുപിന്നാലെയുള്ളത്. 72 ശതമാനത്തോടെ സാരി മുക്ത്സര് സാഹിബ് മൂന്നാമതാണ്.
53.10 ശതമാനം നേടിയ സാഹിബ്ജദ അജിത്ത് സിങ് നഗര് മണ്ഡലത്തിലാണ് കുറഞ്ഞ പോളിങ് നടന്നത്. ഏഴു ഘട്ടങ്ങളിലായി നടക്കുന്ന യുപി തിരഞ്ഞെടുപ്പില് ലളിത്പൂര് 67.37 ശതമാനം പോളിങ് നടന്നു.ഇറ്റായിലും മൊഹാബയിലും യഥാക്രമം 63.55 ശതമാനവും 62.01 ശതമാനവുമാണ് വോട്ടിങ്. അഞ്ചുമണി വരെ നടന്ന കണക്കുപ്രകാരം 50.88 ശതമാനം പോളിങ്ങ് നടന്ന കാണ്പൂര് നഗറിലാണ് ഏറ്റവും കുറവ് രേഖപ്പെടുത്തിയത്.
Comments