പോപ്പുലർ ഫ്രണ്ട്
കണ്ണൂർ: അഹമ്മദാബാദ് സ്ഫോടനക്കേസിലെ കോടതി വിധിക്കെതിരെ പ്രതിഷേധിക്കാനെത്തിയ പോപ്പുലർ ഫ്രണ്ട് പ്രവർത്തകന്റെ പക്കൽ നിന്ന് ആയുധം പിടികൂടി. ചാലാട് സ്വദേശി ഫർഹാൻ ഷെയ്‌ക്കിന്റെ കയ്യിൽ നിന്ന് കഠാരയാണ് പിടികൂടിയത്.
പ്രതിഷേധ പ്രകടനം അവസാനിച്ചിട്ടും തമ്പടിച്ച പോപ്പുലർ ഫ്രണ്ട് പ്രവർത്തകരോട് പോലീസ് പിരിഞ്ഞു പോകാൻ ആവശ്യപ്പെട്ടിരുന്നു. ഇതിനിടെ പോലീസിനോട് തട്ടിക്കയറിയ പോപ്പുലർ ഫ്രണ്ട് പ്രവർത്തകനെ പരിശോധിച്ചപ്പോഴായിരുന്നു ആയുധം കണ്ടെത്തിയത്.
22 സെന്റിമീറ്റർ നീളമുള്ള കഠാരയാണ് പിടിച്ചെടുത്തതെന്ന് പോലീസ് അറിയിച്ചു. ഇയാൾക്കെതിരെ ആയുധ നിയമപ്രകാരം കേസെടുത്തതായി കണ്ണൂർ ടൗൺ സിഐ ശ്രീജിത്ത് കോടേരി വ്യക്തമാക്കി.
അഹമ്മദാബാദ് സ്ഫോടനക്കേസിലെ 38 പ്രതികൾക്ക് കോടതി വധശിക്ഷ വിധിച്ചിരുന്നു. ഇതിൽ പ്രതിഷേധിച്ചായിരുന്നു വൈകീട്ട് കണ്ണൂർ നഗരത്തിൽ പോപ്പുലർ ഫ്രണ്ട് പ്രകടനം നടത്തിയത്.
