മോഹൻലാൽ ചിത്രം ആറാട്ട് റിലീസ് ചെയ്തതിന് പിന്നാലെ തീയേറ്ററിൽ നിന്നുള്ള ഒരു ആരാധകന്റെ വീഡിയോ സോഷ്യൽ മീഡിയയിൽ വൈറലായിരുന്നു. തീയേറ്ററിന് മുന്നിൽ സിനിമയുടെ പ്രതികരണത്തിനായി കാത്തുനിന്ന മാദ്ധ്യമ പ്രവർത്തകരോട് ‘ലാലേട്ടൻ ആറാടുകയാണ്’ എന്ന് പറഞ്ഞ ആരാധകൻ. അദ്ദേഹത്തിന്റെ വീഡിയോ സോഷ്യൽ മീഡിയയിൽ ഹിറ്റായിരുന്നു. നിരവധി ട്രോളുകളും വന്നു. സന്തോഷ് വർക്കി എന്നാണ് അദ്ദേഹത്തിന്റെ പേര്. ഇപ്പോഴിതാ തന്റെ പ്രതികരണത്തെ കുറിച്ചും ട്രോളുകളെ കുറിച്ചും പ്രതികരിക്കുകയാണ് സന്തോഷ് വർക്കി.
‘ഞാൻ ജനിച്ച വർഷമാണ് ലാലേട്ടൻ സൂപ്പർസ്റ്റാർ ആയത്. രാജാവിന്റെ മകൻ റിലീസ് ചെയ്തത്’, സന്തോഷ് പറഞ്ഞു. താൻ നാല് വയസ്സ് മുതൽ ഒരു മോഹൻലാൽ ആരാധകനാണ്. സിനിമയുടെ ആദ്യഭാഗത്തിൽ ലാലേട്ടൻ ആറാടുന്നത് പോലെയാണ് തോന്നിയത്. ഒരു പ്രത്യേകതരം അഭിനയമായി തോന്നി. ഒരിക്കലും പണം വാങ്ങി പ്രമോഷൻ നടത്തിയതല്ല. കള്ളുകുടിച്ചിട്ടുമല്ല. മനസ്സിൽ തോന്നിയ കാര്യങ്ങൾ തുറന്നു പറയുകയായിരുന്നുവെന്ന് സന്തോഷ് വർക്കി പറഞ്ഞു.
മോഹൻലാൽ സിനിമകൾക്ക് നേരെ ഈ അടുത്ത കാലത്ത് ഡീഗ്രേഡിങ് നടക്കുന്നുണ്ട് എന്ന് സന്തോഷ് പറയുന്നു. ‘ഒടിയൻ മുതൽ ഇങ്ങോട്ട് മോഹൻലാൽ സിനിമകൾക്ക് നേരെ ഡീഗ്രേഡിങ് നടക്കുന്നുണ്ട്. അതിന്റെ കാരണം അറിയില്ല. അദ്ദേഹം ആർഎസ്എസുകാരൻ ആണെന്ന് കരുതിയായിരിക്കാം. അദ്ദേഹത്തിന് മോദിയെ ഇഷ്ടമാണെന്ന് അറിയാമെന്നും സന്തോഷ് വർക്കി പറഞ്ഞു. അതേസമയം ആറാട്ട് തീയേറ്ററിൽ പ്രദർശനം തുടരുകയാണ്.
