വാളയാർ: പാലക്കാട് തുടർച്ചയായ രണ്ടാം ദിവസവും കഞ്ചാവ് വേട്ട. വാളയാറിൽ നിന്നാണ് 170 കിലോ കഞ്ചാവ് സ്റ്റേറ്റ് എക്സൈസ് എൻഫോഴ്സ്മെൻറ് പിടികൂടിയത്. എറണാകുളം സ്വദേശിക്ക് വേണ്ടി ആന്ധ്രയിൽ നിന്ന് കടത്തിക്കൊണ്ടു വന്ന കഞ്ചാവാണിത്.
സംഭവവുമായി ബന്ധപ്പെട്ട് രണ്ട് പേർ പോലീസ് പിടിയിലായിട്ടുണ്ട്. രണ്ട് വാഹനങ്ങളും പിടിച്ചെടുത്തിട്ടുണ്ട്. ഇവർ സഞ്ചരിച്ച വാഹനങ്ങളിൽ നിന്ന് 2 വടിവാളും കണ്ടെത്തി. ഇന്നലെ വടക്കഞ്ചേരിക്കടുത്ത് നിന്ന് 188 കിലോ കഞ്ചാവ് പിടികൂടിയിരുന്നു. ഇതിന്റെ തുടർച്ചയായി നടത്തിയ പരിശോധനയിലാണ് ഇന്നും വൻ തോതിൽ കഞ്ചാവ് പിടിച്ചെടുത്തത്.
കാറിൽ കടത്തുകയായിരുന്ന കഞ്ചാവാണ് പിടികൂടിയത്. 85 പാക്കറ്റുകളിലായിട്ടാണ് കാറിൽ കഞ്ചാവ് ഒളിപ്പിച്ചിരുന്നത്. കേസിൽ അറസ്റ്റിലായവർ ഇതിന് മുൻപും കഞ്ചാവ് കടത്ത് ഉൾപ്പെടെ നിരവധി കേസുകളിൽ പ്രതികളാണെന്നും പോലീസ് വ്യക്തമാക്കി. എക്സൈസ് എൻഫോഴ്സ്മെന്റ് സംഘം തുടർനടപടികൾക്കായി പ്രതികളെ ആലത്തൂർ എക്സൈസ് റേഞ്ച് ഓഫീസിന് കൈമാറി.
