ന്യൂഡൽഹി: നാളെ നൂറാം ടെസ്റ്റിനായി ഇറങ്ങുന്ന വിരാട് കോഹ്ലിക്ക് ആശംസ കൾ നേർന്ന് ക്രിക്കറ്റ്‌ലോകം. ശ്രീലങ്കയ്‌ക്കെതിരായ പരമ്പരയിലാണ് മുൻ നായകൻ വിരാട് കോഹ് ലി ഇറങ്ങുന്നത്. മൊഹാലിയിലാണ് ശ്രീലങ്കയ്‌ക്കെതിരായ പരമ്പര യിലെ ആദ്യ ടെസ്റ്റ് നടക്കുന്നത്.
കോഹ്ലി ടെസ്റ്റ് ക്രിക്കറ്റിന് നൽകിയത് ലോകോത്തര ആവേശമാണെന്നാണ് ബിസിസിഐ അദ്ധ്യക്ഷൻ സൗരവ് ഗാംഗുലി പറഞ്ഞത്. ഇന്ത്യക്കായി വളരെ കുറച്ചുപേർ മാത്രമാണ് 100 ടെസ്റ്റുകൾ കളിച്ചിട്ടുള്ളുവെന്നും ഗാംഗുലി പ്രശംസിച്ചു. അണ്ടർ-19 മുതൽ താൻ ശ്രദ്ധിച്ചിരുന്ന താരമാണെന്നും വിരാടിൻരെ പോരാട്ട വീര്യമാണ് തന്നെ ആകർഷിച്ചതെന്നും സച്ചിൻ ആശംസയായി പറഞ്ഞു. ടെസ്റ്റ് ക്രിക്കറ്റ് കാണാൻ ലോകക്രിക്കറ്റ് ആരാധകരെ പ്രേരിപ്പിച്ച ഏറ്റവും മികച്ച ബാറ്റ്‌സ്മാനും നായകനുമാണ് വിരാട് കോഹ്ലിയെന്നും മുൻ നായകന്മാരും താരങ്ങളും പറയുന്നു.
ടെസ്റ്റ് ക്രിക്കറ്റിൽ ഏറെ നാളായി ഒരു സെഞ്ച്വറി നേടാനാകാതെ വിഷമിക്കുന്ന കോഹ്ലി ഇത്തവണ ആ കുറവ് തീർക്കുമെന്നും നൂറാം ടെസ്റ്റിൽ നൂറ് കടക്കുമെന്നുമാണ് ഏവരും പ്രതീക്ഷിക്കുന്നത്. 2019ൽ ബംഗ്ലാദേശിനെതിരെയാണ് അവസാനമായി തന്റെ കരിയറിലെ 70-ാം സെഞ്ച്വറി( ടെസ്റ്റും ഏകദിനവും അടക്കം) നേടിയത്. തുടർന്നു കളിച്ച 70 ഇന്നിംഗ്‌സിൽ ഒന്നിൽ പോലും മൂന്നക്കം കടക്കാനായിട്ടില്ല. 830 ദിവസമാണ് സെഞ്ച്വറിയില്ലാതെ കടന്നുപോകുന്നത്.
2011 ജൂൺ 10ന് വെസ്റ്റിൻഡീസിനെതിരെയാണ് കോഹ്ലിയുടെ ടെസ്റ്റ് അരങ്ങേറ്റം. 99 ടെസ്റ്റുകളിലായി 50.39 ശരാശരിയോടെ 7,962 റൺസാണ് കോഹ്ലി നേടിയിട്ടുള്ളത്. ഇതിൽ 27 സെഞ്ച്വറികളാണുള്ളത്. ടെസ്റ്റ് ക്രിക്കറ്റിൽ 100-ാം മത്സരം കളിക്കുന്ന ലോകക്രിക്കറ്റിലെ 1-ാമനാണ് കോഹ്ലി. ഇന്ത്യൻ താരങ്ങളിൽ 12-ാമനെന്നതും നേട്ടമാണ്.
