മുംബൈ: കരിയറിലെ നൂറാം ടെസ്റ്റ് മത്സരം കളിച്ച ഇന്ത്യൻ മുൻ നായകൻ വിരാട് കോലിയ്ക്ക് അഭിനന്ദനമറിയിച്ച് ഇന്ത്യൻ ടീം പരിശീലകൻ രാഹുൽ ദ്രാവിഡ്. പ്രത്യേക തൊപ്പി സമ്മാനമായി നൽകിയാണ് ദ്രാവിഡ് തന്റെ പ്രിയ ശിഷ്യനെ അഭിനന്ദനമറിയിച്ചത്.
കോലിയുടെ ജീവിതത്തിൽ വരാനിരിക്കുന്ന നല്ല മുഹൂർത്തങ്ങളുടെ തുടക്കം മാത്രമാണിതെന്ന് ദ്രാവിഡ് പറഞ്ഞു. കോലിയ്ക്ക് തന്റെ നേട്ടങ്ങളിൽ അഭിമാനിക്കാം. എപ്പോഴും കോലിയിൽ വലിയ പ്രതീക്ഷയും സമ്മർദ്ദവുമുണ്ട്. എന്നിട്ടും 50 ബാറ്റിങ് ശരാശരി നേടാനായി. എപ്പോഴും മികച്ച പ്രകടനം പുറത്തെടുത്തു.
ലോകത്തെ എല്ലായിടത്തും തിളങ്ങി. ഒരു താരം കൂടി 100 ാം ടെസ്റ്റ് കളിക്കുന്നത് ഇന്ത്യൻ ക്രിക്കറ്റിന് അഭിമാന നിമിഷമാണ്.എളുപ്പം സാധിക്കുന്ന കാര്യമല്ലിത്. കോലിയുടെ കഠിനാധ്വാനത്തിന്റെ ഫലമാണ് ഇവിടെ എത്തി നിൽക്കുന്നത്. അതിനാൽ കോലി ഈ നേട്ടത്തിന് വളരെ അർഹനാണെന്ന് രാഹുൽ പറഞ്ഞു.
രാഹുൽ ദ്രാവിഡിന്റെ അനുമോദനത്തിന് പിന്നാലെ താൻ കുട്ടിക്കാലത്ത് ഏറെ ആരാധിച്ചിരുന്ന നായകൻമാരിൽ നിന്ന് നൂറാം ടെസ്റ്റ് മത്സര ക്യാപ് സ്വീകരിക്കാൻ സാധിച്ചതിൽ വളരെ സന്തോഷവാനാണെന്ന് കോലി പറഞ്ഞു. ഈ അവസരത്തിൽ ഭാര്യ അനുഷ്കയും സഹോദരനും കൂടെയുള്ളത് സന്തോഷം ഇരട്ടിപ്പിക്കുന്നുവെന്ന് അദ്ദേഹം കുറിച്ചു. രാഹുൽ ഗ്രാവിഡിനൊപ്പമുള്ള തന്റെ ആദ്യ ചിത്രം പങ്കുവെച്ചുകൊണ്ടാണ് കോലി കുറിച്ചത്.
അതേസമയം ശ്രീലങ്കയ്ക്കെതിരായ ടെസ്റ്റ് മത്സരത്തിൽ കോലി 45 റൺസിന് പുറത്തായി.
Comments