മോസ്കോ: യൂറോപ്പിലേക്കുള്ള വാതക വിതരണം കുറയ്ക്കുമെന്ന് പടിഞ്ഞാറൻ രാജ്യങ്ങൾക്ക് റഷ്യയുടെ മുന്നറിയിപ്പ്. പാശ്ചാത്യ രാജ്യങ്ങൾ എണ്ണവില ബാരലിന് 300 ഡോളറിലധികം നേരിടേണ്ടിവരും. റഷ്യയിൽ നിന്നുള്ള ഊർജ വിതരണം വെട്ടിക്കുറയ്ക്കുമെന്ന ഭീഷണി പടിഞ്ഞാറൻ സർക്കരുകൾ പിന്തുടരുകയാണെങ്കിൽ റഷ്യ-ജർമ്മനി ഗ്യാസ് പൈപ്പ്ലൈൻ അടച്ചുപൂട്ടാൻ സാധ്യതയുണ്ടെന്നും ഒരു മുതിർന്ന മന്ത്രി തിങ്കളാഴ്ച പറഞ്ഞു.
വാഷിംഗ്ടണും യൂറോപ്യൻ സഖ്യകക്ഷികളും റഷ്യൻ എണ്ണ ഇറക്കുമതി നിരോധിക്കുന്നതിനെക്കുറിച്ച് ആലോചിക്കുന്നതായി യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കെൻ പറഞ്ഞതിനെത്തുടർന്ന് തിങ്കളാഴ്ച എണ്ണവില 2008ന് ശേഷമുള്ള ഏറ്റവും ഉയർന്ന നിലയിലേക്ക് എത്തിയിരരുന്നു. റഷ്യൻ എണ്ണ നിരസിക്കുന്നത് ആഗോള വിപണിയിൽ വിനാശകരമായ പ്രത്യാഘാതങ്ങൾക്ക് ഇടയാക്കുമെന്ന് റഷ്യൻ ഉപപ്രധാനമന്ത്രി അലക്സാണ്ടർ നൊവാക് സ്റ്റേറ്റ് ടെലിവിഷനിൽ ഒരു പ്രസ്താവനയിൽ പറഞ്ഞു.
‘വിലയിലെ കുതിച്ചുചാട്ടം പ്രവചനാതീതമായിരിക്കും. അത് ബാരലിന് 300 ഡോളറായിരിക്കും.’ റഷ്യയിൽ നിന്ന് ലഭിക്കുന്ന എണ്ണയുടെ അളവ് മാറ്റാൻ യൂറോപ്പിന് ഒരു വർഷത്തിലേറെ സമയമെടുക്കുമെന്നും ഗണ്യമായ ഉയർന്ന വില നൽകേണ്ടിവരുമെന്നും നൊവാക് വ്യക്തമാക്കി. ”യൂറോപ്യൻ രാഷ്ട്രീയക്കാർ തങ്ങളുടെ പൗരന്മാർക്കും ഉപഭോക്താക്കൾക്കും എന്താണ് പ്രതീക്ഷിക്കേണ്ടതെന്ന് സത്യസന്ധമായി മുന്നറിയിപ്പ് നൽകേണ്ടതുണ്ട്,” നോവാക് പറഞ്ഞു.
‘റഷ്യയിൽ നിന്നുള്ള ഊർജ്ജ വിതരണങ്ങൾ നിരസിക്കാൻ നിങ്ങൾ ആഗ്രഹിക്കുന്നുവെങ്കിൽ, മുന്നോട്ട് പോകൂ. ഞങ്ങൾ അതിന് തയ്യാറാണ്. യൂറോപ്പിൽ ഗ്യാസിന്റെ 40 ശതമാനം വിതരണം ചെയ്യുന്ന റഷ്യ അതിന്റെ ബാധ്യതകൾ പൂർണ്ണമായി നിറവേറ്റുന്നുണ്ട്. എന്നാൽ ജർമ്മനി കഴിഞ്ഞ മാസം നോർഡ് സ്ട്രീം 2 ഗ്യാസ് പൈപ്പ്ലൈനിന്റെ സർട്ടിഫിക്കേഷൻ മരവിപ്പിച്ചു. യൂറോപ്യൻ യൂണിയനെതിരെ പ്രതികാരം ചെയ്യാനുള്ള അവകാശം പൂർണ്ണമായും നിറവേറ്റുമെന്നും നോവാക് പറഞ്ഞു. ഉപരോധം ഏർപ്പെടുത്താനും തങ്ങൾക്ക് എല്ലാ അവകാശവുമുണ്ട് നോവാക് കൂട്ടിച്ചേർത്തു. ”ഇതുവരെ ഞങ്ങൾ അത്തരമൊരു തീരുമാനമെടുത്തിട്ടില്ല. എന്നാൽ യൂറോപ്യൻ രാഷ്ട്രീയക്കാർ റഷ്യയ്ക്കെതിരായ പ്രസ്താവനകളും ആരോപണങ്ങളും കൊണ്ട് ഞങ്ങളെ അതിലേക്ക് തള്ളിവിടരുതെന്നും അദ്ദേഹം മുന്നറിയിപ്പ് നൽകി.
