മുംബൈ: വനിതാ ദിനത്തിൽ ആശംസയ്‌ക്കൊപ്പം പരസ്യം കൊടുത്ത് ബിസിനസ് പൊടിപൊടിക്കാമെന്ന് കരുതിയ ഫ്‌ളിപ്പ്കാർട്ടിന് തിരിച്ചടി. വനിതാ ദിനത്തിൽ അടുക്കള ഉപകരണങ്ങൾക്ക് ഓഫർ നൽകി കൊണ്ടായിരുന്നു ഫ്ളിപ്പ് കാർട്ട് പരസ്യം നൽകിയത്.
ഈ വനിതാ ദിനത്തിൽ സ്ത്രീത്വത്തെ ആഘോഷിക്കുന്നുവെന്ന അടിക്കുറുപ്പോടെയായിരുന്നു അടുക്കള ഉപകരണങ്ങൾക്കുള്ള ഓഫർ പ്രഖ്യാപിച്ചിരുന്നത്. പരസ്യം വന്നതിന് പിന്നാലെ നിരവധി പേരാണ് ഇതിനെ വിമർശിച്ച് രംഗത്തെത്തിയത്.
സ്ത്രീകൾ അടുക്കളയിലെ ജോലികൾ ചെയ്യേണ്ടവരാണെന്ന തെറ്റായ പൊതുബോധത്തെ പ്രോത്സാഹിപ്പിക്കുന്നതാണ് പരസ്യമെന്നായിരുന്നു പ്രധാന ആരോപണം. സമത്വത്തിനായുള്ള സ്ത്രീകളുടെ പ്രവർത്തനങ്ങളെ കണ്ടില്ലെന്ന് നടിക്കുന്ന രീതിയാണ് ഫ്‌ളിപ്പ്കാർട്ടിന്റേതെന്ന് വരെ ആരോപണം ഉയർന്നിരുന്നു.
https://twitter.com/Flipkart/status/1501171737953591296/photo/1
പുതിയ പരസ്യം വലിയ വിവാദത്തിന് തിരികൊളുത്തിയതോടെ കമ്പനി ഖേദപ്രകടനവുമായി രംഗത്തെത്തി. വനിതാ ദിന സന്ദേശത്തിലെ തെറ്റ് ബോധ്യപ്പെട്ടെന്നും അതിൽ നിർവ്യാജം ഖേദിക്കുന്നുവെന്നും ഫ്ളിപ്പ് കാർട്ട് ട്വിറ്ററിൽ കുറിച്ചു. ആരേയും വേദനിപ്പിക്കാൻ ഉദ്ദേശിച്ചിരുന്നില്ലെന്നും ഫ്ളിപ്പ് കാർട്ട് ട്വിറ്ററിലൂടെ അറിയിച്ചു.
