ശ്രീനഗർ : ജമ്മു കശ്മീരിൽ ഭീകര സംഘടനയായ ലഷ്കർ ഇ ത്വായ്ബയിലെ മൂന്ന് ഭീകരനെ വധിച്ച് സുരക്ഷാ സേന. ശ്രീനഗറിലെ നൗഗാമിൽ നടന്ന ഏറ്റുമുട്ടലിലാണ് ഭീകരരെ സുരക്ഷാ സേന വധിച്ചത്. ഖൻമോഗഹ് ഗ്രാമത്തിലെ ഗ്രാമമുഖ്യനെ ഇവരാണ് കൊന്നതെന്ന് കശ്മീർ ഐജി വിജയ് കുമാർ അറിയിച്ചു.
കഴിഞ്ഞ ബുധനാഴ്ചയാണ് ഖൻമോഗഹ് ഗ്രാമത്തിലെ ഗ്രാമമുഖ്യൻ ആയ സമീർ അഹമ്മദ് ഭട്ട് കൊല്ലപ്പെട്ടത്. വാഹനങ്ങളിൽ എത്തിയ ഭീകരരാണ് സമീറിന് നേരെ ആക്രമണം നടത്തിയത്. ഗുരുതരമായി പരിക്കേറ്റ അദ്ദേഹത്തെ ഉടനെ ആശുപത്രിയിൽ എത്തിച്ചെങ്കിലും ചികത്സയിലിരിക്കേ മരിക്കുകയായിരുന്നു. രണ്ട് വെടിയുണ്ടകളാണ് അദ്ദേഹത്തിന്റെ നെഞ്ചിൽ തറച്ചത്. ഇത് ശസ്ത്രക്രിയ വഴി പുറത്തെടുത്തെങ്കിലും ജീവൻ രക്ഷിക്കാൻ ആയില്ലെന്ന് ആശുപത്രി അധികൃതർ പറഞ്ഞു
അതേസമയം ഭീകരർ ഒളിച്ചിരിപ്പുണ്ടെന്ന രഹസ്യ വിവരത്തിന്റെ അടിസ്ഥാനത്തിലാണ് സുരക്ഷാ സേന നൗഗാമിൽ പരിശോധന നടത്തിയത്. ഇവരെ സംബന്ധിച്ച് കൂടുതൽ വിവരങ്ങൾ പുറത്തുവിട്ടിട്ടില്ല.
