ഭാര്യയുമായി ഷോപ്പിംഗിന് പോകുന്ന മിക്ക ഭർത്താക്കന്മാരുടെയും പരാതിയാണ് സാധനങ്ങൾ വാങ്ങാനും മറ്റും ഭാര്യമാർ ഒരുപാട് നേരമെടുക്കുന്നുവെന്നത്. എന്നാൽ ഷോപ്പിംഗിന് കൂടെ പോകുന്ന ഭർത്താക്കന്മാരെ ‘സൂക്ഷിക്കാൻ’ ഒരു പ്രത്യേക മുറി ഒരുക്കിയിരിക്കുകയാണ് ചൈനയിലെ ഒരു മാൾ. ഹസ്ബൻഡ് സ്‌റ്റോറേജ് പോഡ് എന്നാണ് മുറിക്ക് പേരിട്ടിരിക്കുന്നത്.
ഭാര്യമാരുടെ മണിക്കൂറുകൾ നീണ്ട ഷോപ്പിംഗിൽ ക്ഷമ കെടുന്ന ഭർത്താക്കൻമാർക്കും സ്വസ്ഥമായ ഷോപ്പിംഗിന് സമ്മതിക്കാത്ത ഭർത്താക്കൻമാരെ എങ്ങനെ മാറ്റിനിർത്തുമെന്ന് ആലോചിക്കുന്ന ഭാര്യമാർക്കും ഒരുപോലെ ഉപകാരമാണ് ഈ കൊച്ചുമുറിയെന്ന് മാൾ അധികൃതർ പറയുന്നു. ഷാൻഹായിയിലെ ഗ്ലോബൽ ഹാർബർ മാളിലാണ് പുതിയ പരീക്ഷണം കൗതുകമാകുന്നത്.
ഷോപ്പിംഗിൽ നല്ല സാധനങ്ങളും, ഗുണനിലവാരമുള്ളവയും തിരഞ്ഞെടുക്കുമ്പോൾ അൽപ്പം സമയം വൈകിയേക്കാം. എന്നാൽ ഇതിനെ കുറ്റമായാണ് മിക്ക പുരുഷന്മാരും കാണുന്നത്. ഭാര്യമാർ സമയം മെനക്കെടുത്തുകയാണെന്ന് പറഞ്ഞ് ചിലർ ഷോപ്പിംഗിന് പോകാനും മടിക്കാറുണ്ട്. ഈ സ്ഥിതിക്ക് മാറ്റം വരുത്തുകയാണ് പുതിയ ആശയത്തിലൂടെ മാൾ അധികൃതർ ഉദ്ദേശിച്ചത്.
ചില്ലുകൾ കൊണ്ട് നിർമ്മിച്ച മുറിയാണ് ഭർത്താക്കന്മാർക്കായി ഒരുക്കിയിരിക്കുന്നത്. ഒരു മുറിയിൽ ഒരാൾക്ക് ഇരിക്കാനുള്ള സംവിധാനങ്ങളാണുള്ളത്. ഷോപ്പിംഗ് മാളുകളിൽ ഭാര്യമാർ നൽകുന്ന കട്ട’പോസ്റ്റ്’ അസഹനീയമായവർക്ക് ഇവിടെ വിശ്രമിക്കുകയും ഗെയിമുകളിൽ ഏർപ്പെടുകയും ചെയ്യാം. വെറുതെ ആ മുറിയിൽ ഇരിക്കാൻ പൈസ അടക്കേണ്ട. എന്നാൽ ഗെയിം കളിക്കണമെങ്കിൽ ചെറിയൊരു തുക അടയ്‌ക്കണം.
സംഗതി വൈറലായതിന് പിന്നാലെ, സമൂഹമാദ്ധ്യമങ്ങളിൽ ചർച്ചകളും തലപൊക്കി. നല്ല ആശയമെന്ന് ചിലർ അഭിപ്രായപ്പെടുമ്പോൾ മറ്റുചിലരാകട്ടെ ഇതിനെ വിമർശിച്ചുകൊണ്ടാണ് രംഗത്തെത്തിയിരിക്കുന്നത്.
