മുംബൈ: രാജ്യാന്തര ക്രിക്കറ്റിൽ അരങ്ങേറ്റം കുറിച്ചത് മുതൽ ക്യാപ്റ്റൻ കൂളിന്റെ ജെഴ്സി നമ്പർ 7 ആണ്. ഈ നമ്പർ തന്റെ ജെഴ്സി നമ്പറായി തിരഞ്ഞെടുക്കാനുണ്ടായ കാരണം വെളിപ്പെടുത്തിയിരിക്കുകയാണ് മുൻ ഇന്ത്യൻ ക്യാപ്റ്റൻ എംഎസ് ധോണി. 7 എന്നത് തന്റെ ഭാഗ്യ നമ്പർ ആയതുകൊണ്ടല്ല അത് തന്നെ തിരഞ്ഞെടുത്തത്. മറിച്ച് തന്റെ ജന്മദിനം ജൂലൈ 7 ആയതുകൊണ്ടാണ് ഈ നമ്പർ തന്നെ ജെഴ്സി നമ്പറായി തിരഞ്ഞെടുത്തതെന്നും ധോണി പറയുന്നു. ഇതിന് പിന്നിൽ യാതൊരു അന്ധവിശ്വാസങ്ങളുമില്ലെന്നും, തനിക്ക് അത്തരം അന്ധവിശ്വാസങ്ങളിൽ താൽപര്യമില്ലെന്നും ധോണി വ്യക്തമാക്കി.
‘ധാരാളം ആളുകൾ ചിന്തിച്ചത് 7 എന്നത് ഭാഗ്യ നമ്പർ ആയതുകൊണ്ടാണ് ഞാൻ അതുതന്നെ തിരഞ്ഞെടുത്തത് എന്നാണ്. എന്നാൽ അതിനുള്ള കാരണം വളരെ ലളിതമാണ്. ഏഴാം മാസത്തിലെ ഏഴാം ദിവസമാണ് ഞാൻ ജനിച്ചത്. അതായത് ജൂലൈ 7. അതുതന്നെയാണ് ഞാൻ ഈ നമ്പർ തന്നെ തിരഞ്ഞെടുക്കാൻ കാരണവും. ചിലർക്ക് മാത്രം ലഭിക്കുന്ന ഭാഗ്യമാണ് ഇത്തരത്തിൽ ജനിച്ച മാസവും, ദിവസവും ഒരേ അക്കം വരുക എന്നത്. അതുകൊണ്ട് ആ നമ്പർ എന്റെ ജെഴ്സി നമ്പറാക്കി ഞാൻ കൂടെകൂട്ടി. അതല്ലാതെ മറ്റൊന്നും കൊണ്ടല്ല ഞാൻ 7 എന്ന നമ്പർ തിരഞ്ഞെടുക്കാനുള്ള കാരണം’ ചെന്നൈ സൂപ്പർ കിംഗിന്റെ ഔദ്യോഗിക യൂട്യൂബ് ചാനലിൽ പോസ്റ്റ് ചെയ്ത വീഡിയോയിൽ ധോണി വ്യക്തമാക്കി.
തന്നോട് ജെഴ്സി നമ്പർ 7 എന്തുകൊണ്ട് തിരഞ്ഞെടുത്തു എന്ന് ചോദിക്കുന്നവരോട് പറയുന്ന മറ്റൊരു കാര്യം എന്തെന്നാൽ, താൻ ജനിച്ചത് 1981ലാണ്. എട്ടിൽ നിന്നും ഒന്ന് കുറച്ചാൽ ഏഴാണ്. ഈ നമ്പർ നമുക്ക് അനുകൂലമായി ഒന്നും ചെയ്തില്ലെങ്കിലും, നമുക്ക് എതിരായി ഒന്നും ചെയ്യില്ല എന്നാണ് ആളുകൾ പറയുന്നത്. ഇത് അന്ധവിശ്വാസമാണോ എന്ന് തനിക്ക് അറിയില്ല. എന്നാൽ 7 എന്ന നമ്പർ താൻ ഹൃദയത്തോട് ചേർത്ത് വെയ്ക്കുന്നു എന്നും ധോണി വ്യക്തമാക്കി.
