കോഴിക്കോട് : ചങ്ങനാശേരി മാടപ്പള്ളിയിൽ കെ റെയിലിനെതിരെ പ്രതിഷേധം സംഘടിപ്പിച്ചതിന് സ്ത്രീകളെ ഉൾപ്പെടെ വലിച്ചിഴച്ച് അറസ്റ്റ് ചെയ്തതിന് പിന്നാലെ കല്ലായിയിലും പോലീസിന്റെ അതിക്രമം. കല്ലായിയിൽ കെ റെയിൽ കല്ലിടാൻ എത്തിയ പോലീസുകാർക്ക് നേരെ നാട്ടുകാർ പ്രതിഷേധിച്ചു. പ്രതിഷേധ സംഘത്തിലുണ്ടായിരുന്ന സ്ത്രീകളെ ഉൾപ്പെടെ പുരുഷ പോലീസുകാർ മർദ്ദിച്ചു, ലാത്തി കൊണ്ട് കുത്തി. വേദന കൊണ്ട് പൊട്ടിക്കരയുന്ന സ്ത്രീയുടെ ദൃശ്യങ്ങളാണ് സമൂഹമാദ്ധ്യമങ്ങളിൽ പ്രചരിക്കുന്നത്. ലാത്തി കൊണ്ടുളള കുത്തേറ്റ് വേദന കൊണ്ട് സ്ത്രീകൾ ഉൾപ്പെടെയുളളവർ വേദന കൊണ്ട് നിലവിളിച്ചിട്ടും പോലീസ് വിട്ടില്ല.
കല്ലായിയിൽ മുൻകൂട്ടി അറിയിക്കാതെയാണ് പോലീസ് കെ റെയിൽ കല്ല് സ്ഥാപിക്കാൻ എത്തിയത്. ഇതോടെ നാട്ടുകാർ പ്രതിഷേധിച്ചെത്തി. എന്നാൽ സ്ത്രീകൾ ഉൾപ്പെടെയുള്ള പ്രതിഷേധക്കാരെ പോലീസ് അറസ്റ്റ് ചെയ്ത് നീക്കുകയായിരുന്നു. ബലം പ്രയോഗിച്ചാണ് ഇവരെ ജീപ്പിൽ കയറ്റിയത്. അതിനിടെ ഉദ്യോഗസ്ഥർ കെ റെയിൽ കല്ലുകളും സ്ഥാപിച്ചു. കോഴിക്കോട് എസിപിയുടെ നേതൃത്വത്തിലുള്ള വൻ പോലീസ് സംഘമാണ് പ്രതിഷേധക്കാരെ നേരിട്ടത്.
കഴിഞ്ഞ ദിവസം ചങ്ങനാശ്ശേരിയിലെ മാടപ്പള്ളിയിലും സമാന സംഭവങ്ങൾ നടന്നിരുന്നു. കെ റെയിൽ കല്ല് സ്ഥാപിക്കാൻ എത്തിയ പോലീസിനെതിരെ നാട്ടുകാർ പ്രതിഷേധിച്ചപ്പോൾ, പോലീസ് ബലം പ്രയോഗിച്ച് ഇവരെ അറസ്റ്റ് ചെയ്ത് നീക്കുകയായിരുന്നു. കുട്ടികളുടെ മുന്നിലൂടെയാണ് അമ്മമാരെ വലിച്ചിഴച്ച് കൊണ്ട് പോയത്. പോലീസിന്റെ ഈ പ്രവൃത്തിക്കെതിരെ വ്യാപക വിമർശനങ്ങളാണ് ഉയർന്നത്.
