ന്യൂഡൽഹി: ഡൽഹിയിൽ മുൻസിപ്പൽ തെരഞ്ഞെടുപ്പ് അടുത്തതോടെ ജനശ്രദ്ധ പിടിച്ചുപറ്റാനുളള ഗിമ്മിക്കുകളുമായി രംഗത്തെത്തിയിരിക്കുയാണ് പാർട്ടികൾ. ആം ആദ്മി പാർട്ടി കൗൺസിലർ ഹസീബ് ഉൽ ഹസ്സന്റെ വീഡിയോയാണ് ഇപ്പോൾ സോഷ്യൽ മീഡിയയിൽ ചർച്ചയായിരിക്കുന്നത്. ജനങ്ങളുടെ പ്രീതി ലഭിക്കാനായി അഴുക്ക് ചാലിലേക്ക് ഇറങ്ങി വൃത്തിയാക്കുകയാണ് ഹസീബ്. ബിജെപിയെ വെല്ലുവിളിച്ചാണ് ഹസീബ് ഓടയിലേക്ക് ഇറങ്ങുന്നത്.
ശാസ്ത്രി പാർക്കിലെ ഓടയിലേക്കാണ് ഹസീബ് ഇറങ്ങിയത്. മലിനജലം നീക്കുന്നതും നെഞ്ച് ആഴത്തിൽ മലിന ജലം ഉള്ളതും വീഡിയോയിൽ കാണാൻ സാധിക്കും. ഒരു കമ്പ് ഉപയോഗിച്ച് അദ്ദേഹം മാലിന്യങ്ങൾ നീക്കം ചെയ്യുകയാണ്. ചുറ്റം കൂടിയിരിക്കുന്ന അനുയായികൾ കമ്പും വടിയുമെല്ലാം തങ്ങളുടെ പ്രിയപ്പെട്ട നേതാവിന് കൈമാറുന്നുമുണ്ട്. ചിലർ മൊബൈലിൽ ദൃശ്യങ്ങൾ പകർത്തുന്നുമുണ്ട്.
അഴുക്ക് ചാൽ ശുചീകരണത്തിന് ശേഷം ഹസീബിനെ പാർട്ടി അനുയായികൾ പാലിൽ കുളിപ്പിക്കുകയാണ് ചെയ്തത്. ഇതിന്റെ വീഡിയോയും സോഷ്യൽ മീഡിയയിൽ പ്രചരിക്കുന്നുണ്ട്. നിരവധി തവണ അഴുക്ക് ചാൽ വൃത്തിയാക്കുന്ന വിവരം പറഞ്ഞതാണെന്നും ആരും അത് ശരിയാക്കിയില്ലെന്നും ഹസീബ് പറയുന്നു. അതേസമയം വൃത്തിയാക്കലും ശേഷമുള്ള മിൽക്ക് ബാത്തും എന്ത് പ്രഹസനമാണെന്നാണ് നാട്ടുകാർ ചോദിക്കുന്നത്.
രാജ്യ തലസ്ഥാനത്തെ മൂന്ന് മുൻസിപ്പൽ കോർപ്പറേഷനുകളെ ലയിപ്പിച്ച് ഒന്നാക്കാൻ വ്യവസ്ഥ ചെയ്യുന്ന ബില്ലിന് കേന്ദ്ര മന്ത്രിസഭാ യോഗം അംഗീകാരം നൽകിയിരുന്നു. പിന്നാലെ ബിജെപിയും എഎപിയും പ്രദേശത്ത് പ്രതിഷേധം തുടരുകയാണ്. ഈസ്റ്റ് ഡൽഹി മുൻസിപ്പൽ കോർപ്പറേഷൻ, നോർത്ത് ഡൽഹി മുൻസിപ്പൽ കോർപ്പറേഷൻ, സൗത്ത് ഡൽഹി മുൻസിപ്പൽ കോർപ്പറേഷൻ എന്നിവയെ ഏകീകരിക്കാനാണ് തീരുമാനം. ബില്ല് പാസാകുന്നതോടെ ഏകീകൃത ഡൽഹി കോർപ്പറേഷൻ രൂപപ്പെടും.
