തിരുവനന്തപുരം: തനിക്കു കറുപ്പ് നിറമാണെന്ന മുൻമന്ത്രി എംഎം മണിയുടെ പരിഹാസത്തിന് മറുപടിയുമായി തിരുവഞ്ചൂർ രാധാകഷ്ണൻ രംഗത്ത്. എംഎം മണിയ്ക്ക് മുൻ യുഎസ് പ്രസിഡന്റ് ഡൊണാൾഡ് ട്രംപിന്റെ നിറമാണോയെന്ന് അദ്ദേഹം ചോദിച്ചു.
ഈയിടെ എംഎം മണി പറഞ്ഞു. എനിക്ക് കറുപ്പ് നിറമാണെന്ന്,അദ്ദേഹത്തിന് ട്രംപിന്റെ നിറമാണല്ലോ,നല്ല കൃത്യമാണ്,ഇതുപോലുള്ള പാഴ് വാക്ക് പറയുന്നവരുണ്ട് നമ്മൾ അവരെ അവഗണിക്കുകയെന്ന് തിരുവഞ്ചൂർ പറഞ്ഞു.
അഞ്ചേരി ബേബി വധക്കേസിൽ ഹൈക്കോടതി കുറ്റ വിമുക്തനാക്കിയതിന് ശേഷമാണ് എംഎം മണി വിവാദപരാമർശം നടത്തിയത്. തിരുവഞ്ചൂർ വഞ്ചകനാണെന്നും അദ്ദേഹം രാഷ്ട്രീയ വൈരാഗ്യം തീർക്കുകയാണെന്നും എംഎം മണി ആരോപിച്ചിരുന്നു.
ഇതിന് പിന്നാലെ മണിയുടെ ശത്രു അദ്ദേഹത്തിന്റെ നാക്ക് തന്നെയാണെന്നും നിറത്തിന്റെ കാര്യത്തിൽ താനും അദ്ദേഹവും തമ്മിൽ വലിയ വ്യത്യാസമൊന്നും ഇല്ല, എന്നേക്കാൾ കുറച്ചുകൂടി കൃഷ്ണനാണ് എംഎം മണി. നിലവാരം വിട്ടിട്ടുള്ള ഒരു വിമർശനത്തിനും താൻ തയ്യാറല്ലന്ന് അദ്ദേഹം പറഞ്ഞിരുന്നു.
1982 ലാണ് കോൺഗ്രസ് പ്രവർത്തകനായ അഞ്ചേരി ബേബി കൊല്ലപ്പെട്ടത്. 1988 ൽ തന്നെ കേസിലെ 9 പ്രതികളേയും കോടതി കുറ്റക്കാരല്ലെന്ന് കണ്ടെത്തി വിട്ടയിച്ചിരുന്നു. എന്നാൽ 2012 മെയിൽ ഇടുക്കി മണക്കാടിൽ വെച്ച് നടത്തിയ വിവാദ പ്രസംഗത്തിലൂടെ കൊലപാതക കേസിൽ മണി പ്രതിയാവുകയായിരുന്നു.
പൊതുയോഗത്തിൽ മണി ഈ കൊലപാതകങ്ങളെ 1,2,3 എന്ന് അക്കമിട്ട് സൂചിപ്പിക്കുകയായിരുന്നു തുടർന്ന് കൊലപാതക കേസിൽ ഹൈക്കോടതി പുനരന്വേഷണത്തിന് ഉത്തരവിടുകയും 2012 നവംബറിൽ അന്നത്തെ സിപിഎം ജില്ലാ സെക്രട്ടറി എംഎം മണിയടക്കമുള്ള മൂന്ന് നേതാക്കൾ അറസ്റ്റിലാവുകയും ചെയ്തു. കേസുമായി ബന്ധപ്പെട്ട് എം.എം.മണിയും കൂട്ടുപ്രതികളും 46 ദിവസം ജയിലിൽ കിടന്നിരുന്നു
