ന്യൂഡല്ഹി: സില്വര്ലൈന് പദ്ധതിക്കെതിരെ പാര്ലമെന്റിലേക്ക് പ്രതിഷേധ മാര്ച്ച് നടത്തിയ കേരളത്തില് നിന്നുള്ള എംപിമാരെ സുരക്ഷാ ഉദ്യോഗസ്ഥര് തടഞ്ഞു. ഉദ്യോഗസ്ഥര് തങ്ങളെ കയ്യേറ്റം ചെയ്തുവെന്ന് എംപിമാര് ആരോപിച്ചു. പുരുഷ പോലീസുകാര് തന്നെ തള്ളിമാറ്റിയെന്ന് രമ്യ ഹരിദാസ് എം.പി ആരോപിച്ചു. ഹൈബി ഈഡന് എംപിയുടെ മുഖത്ത് പോലീസിന്റെ അടികൊണ്ടു. ടിഎന് പ്രതാപനെ പോലീസ് തള്ളിമാറ്റുന്നത് ഉള്പ്പെടെയുള്ള ദൃശ്യങ്ങള് പുറത്ത് വന്നിട്ടുണ്ട്.
എംപിമാരെ പാര്ലമെന്റ് വളപ്പില് വച്ച് പോലീസ് തടഞ്ഞതോടെ എംപിമാര് പ്രതിഷേധിച്ച് ഉദ്യോഗസ്ഥരെ തള്ളിമാറ്റി മുന്നോട്ട് പോവുകയായിരുന്നു. സുരക്ഷാ കാരണങ്ങള് കൊണ്ട് മാര്ച്ച് നടത്താന് കഴിയില്ലെന്ന് പോലീസ് ആദ്യമേ അറിയിച്ചിരുന്നു. തങ്ങള് എംപിമാരാണെന്ന് പറഞ്ഞ് മുന്നോട്ട് പോകാന് ശ്രമിച്ചെങ്കിലും, പോലീസ് ഇത് എതിര്ത്തു. ബാരിക്കേഡ് വച്ച് തടഞ്ഞെങ്കിലും എംപിമാര് ഇത് മറികടന്ന് പാര്ലമെന്റിലേക്ക് പോവുകയായിരുന്നു.
ഇതിനിടെയാണ് ഇരുകൂട്ടരും തമ്മില് ഉന്തും തള്ളും ഉണ്ടായത്. പാര്ലമെന്റിനുള്ളിലും നേതാക്കള് ഈ വിഷയം ഉന്നയിച്ചു. സംഭവിച്ചത് എന്താണെന്ന് എഴുതി നല്കാനായിരുന്നു സ്പീക്കര് നല്കിയ നിര്ദ്ദേശം.
Comments