മുംബൈ: ഐപിഎല്ലിന്റെ പതിനഞ്ചാം സീസൺ ആരംഭിക്കാനിരിക്കെ സോഷ്യൽ മീഡിയ ടീമിനെ പുറത്താക്കി രാജസ്ഥാൻ റോയൽസ്.ക്യാപ്റ്റനും മലയാളി താരവുമായ സഞ്ജു സംസണിനെ അപമാനിക്കുന്ന തരത്തിലുള്ള ചിത്രം ട്വീറ്റ് ചെയ്തതിനാണ് മാനേജ്‌മെന്റ് സോഷ്യൽ മീഡിയ ടീമിനെ പുറത്താക്കിയത്.
ടീമിന്റെ ബസിൽ സഞ്ജു യാത്ര ചെയ്യുന്ന ചിത്രം എഡിറ്റ് ചെയ്താണ് സോഷ്യൽ മീഡിയ ടീം പ്രചരിപ്പിച്ചത്. ചിത്രത്തിൽ സഞ്ജുവിന് നീല തലപ്പാവും കറുത്ത കണ്ണടയും കമ്മലുമാണ് എഡിറ്റ് ചെയ്ത് ചേർത്തത്.എത്ര സുന്ദരമായിരിക്കുന്നു, എന്ന തലക്കെട്ടോടെയാണ് ചിത്രം പോസ്റ്റ് ചെയ്തത്.
ഇതിന് പിന്നാലെ താരം തന്നെ മറുപടിയുമായി രംഗത്തെത്തി. സുഹൃത്തുക്കളാണ് ഇങ്ങനെ ചെയ്യുന്നതെങ്കിൽ കുഴപ്പമില്ല പക്ഷേ ടീം പ്രൊഫഷണലായിരിക്കണം എന്ന് പറഞ്ഞ് സഞ്ജു ട്വീറ്റിനെ ടാഗ് ചെയ്യുകയും രാജ്സ്ഥാൻ റോയൽസിന്റെ അക്കൗണ്ട് അൺഫോളോ ചെയ്യുകയും ചെയ്തു. ഇതിന് പിന്നാലെയാണ് സോഷ്യൽ മീഡിയ ടീമിനെ മാറ്റുകയാണെന്ന് പറഞ്ഞ് ടീം മാനേജ്‌മെന്റ് രംഗത്തെത്തിയത്.
‘ഇന്നത്തെ സംഭവവികാസങ്ങളുടെ പേരിൽ ഞങ്ങളുടെ സമീപനത്തിലും സോഷ്യൽ മീഡിയയിലെ ടീമിലും മാറ്റങ്ങൾ വരുത്തിയിരിക്കുകയാണ്. ആദ്യ മൽസരത്തിനു മുന്നോടിയായി ടീമിനുള്ളിൽ എല്ലാം മികച്ച രീതിയിൽ തന്നെയാണ്. സൺറൈസേഴ്സ് ഹൈദരാബാദുമായുള്ള ആദ്യ മത്സരത്തിനു സംഘം തയ്യാറെടുക്കുകയാണ്.
https://twitter.com/rajasthanroyals/status/1507357071863586818/photo/1
എന്നാൽ സോഷ്യൽ മീഡിയ മാനേജ്‌മെന്റിനെ മാറ്റി പുതിയ ടീമിനെ ഉടൻ നിയമിക്കും.ഐപിഎൽ സീസണായതിനാൽ തന്നെ സ്ഥിരമായി അപ്‌ഡേഷനുകൾ വേണമെന്ന് ആരാധകർ ആഗ്രഹിക്കും. താൽക്കാലികമായി ഇതിനൊരു സംവിധാനം ഉടനെയൊരുക്കും.’ രാജസ്ഥാൻ റോയൽസ് പുറത്തിറക്കിയ പ്രസ്താവനയിൽ വ്യക്തമാക്കി.
