ആലപ്പുഴ: കെ-റെയിലിനെതിരായ സമരത്തിലെ തീവ്രവാദ സംഘടനകൾ ഏതൊക്കെയെന്ന് മന്ത്രി മുഹമ്മദ് റിയാസ് വ്യക്തമാക്കണമെന്ന് മുൻ പ്രതിപക്ഷ നേതാവ് രമേശ് ചെന്നിത്തല. കെ-റെയിൽ വിരുദ്ധ സമരത്തെ തീവ്രവാദ സംഘടനകൾ നടത്തുന്ന സമരമെന്ന് അധിക്ഷേപിക്കുന്നത് ശരിയല്ല. കെ-റെയിലിനെതിരെ സമരം നടത്തുന്നത് ഓരോ പ്രദേശത്തേയും നാട്ടുകാരാണെന്നും ചെന്നിത്തല പറഞ്ഞു.
തീവ്രവാദ സംഘടനകൾ സമരത്തിന് പിന്നിലുണ്ടെന്ന് പറഞ്ഞ മന്ത്രി റിയാസ് ഏതാണ് ആ തീവ്രവാദ സംഘടനയെന്ന് കൂടി വ്യക്തമാക്കണമെന്ന് ചെന്നിത്തല ആവശ്യപ്പെട്ടു. വിദേശ ഫണ്ട് വാങ്ങി അഴിമതി നടത്താൻ വേണ്ടിയാണ് സാമൂഹികാഘാത പഠനത്തിന് എന്ന പേരിൽ ഇടതു സർക്കാർ കെ റെയിൽ കല്ല് സ്ഥാപിക്കുന്നത്. അതിനെ യുഡിഎഫ് പ്രതിരോധിക്കുമെന്നും ചെന്നിത്തല പറഞ്ഞു.
ദേശീയപാത വികസനത്തിൽ ജനങ്ങളുടെ തെറ്റിദ്ധാരണ മാറ്റിയത് പോലെ സിൽവർ ലൈൻ വിഷയത്തിലും തെറ്റിദ്ധാരണകൾ മാറ്റുമെന്നാണ് മന്ത്രി പറഞ്ഞത്. ഒരു ചെറിയ വിഭാഗമാണ് തെറ്റിദ്ധാരണ പരത്തുന്നത്. ഡിവൈഎഫ്‌ഐയുടെ വീട് കയറിയുള്ള ബോധവത്കരണത്തിലൂടെ തെറ്റിദ്ധാരണകൾ തിരുത്തും. പ്രകടന പത്രികയിൽ പറഞ്ഞകാര്യമാണ് കെ-റെയിൽ എന്നും റിയാസ് പറഞ്ഞിരുന്നു.
