കൊച്ചി : പഞ്ചാബിൽ അധികാരത്തിൽ ഏറിയതിന് പിന്നാലെ കേരളവും പിടിച്ചെടുക്കാൻ തയ്യാറായി ആം ആദ്മി പാർട്ടി. കേരളത്തിൽ നേരത്തെ തന്നെ പ്രവർത്തനം തുടങ്ങിയ എഎപി ശക്തമായ സാന്നിധ്യമായി മാറാനുള്ള ശ്രമത്തിലാണ്. അതിനായി കേരളത്തിൽ പാർട്ടി പുതിയ ഓഫീസും ആരംഭിച്ചു. സംസ്ഥാന കമ്മിറ്റിയുടെ പ്രവർത്തനത്തിനായി കൊച്ചിയിലാണ് പുതിയ ഓഫീസ് തുറന്നിരിക്കുന്നത്.
ആം ആദ്മി പാർട്ടിയുടെ പുതിയ കേരള സംസ്ഥാന ഓഫീസ്, എറണാകുളം നോർത്ത് റെയിൽവേ സ്റ്റേഷന് എതിർവശം മേത്തർ ബിൽഡിംഗിലാണ് തുറന്നത്. കേരളത്തിന്റ ചുമതലയുള്ള പ്രഭാരി എൻ രാജയാണ് സംസ്ഥാന കമ്മിറ്റി ഓഫീസ് ഉദ്ഘാടനം നിർവ്വഹിച്ചത്. ആം ആദ്മി പാർട്ടി കേരളത്തിൽ ശക്തിപ്പെടുത്തുമെന്നും, പാർട്ടി ദേശീയ സമിതിയുടെ ഫോക്കസ് സംസ്ഥാനങ്ങളിൽ കേരളവും ഉൾപ്പെടുമെന്നും എൻ രാജ പറഞ്ഞു.
പഞ്ചാബിൽ കോൺഗ്രസിനെ മലർത്തിയടിച്ച് ആം ആദ്മി, പ്രവർത്തനം കൂടുതൽ സംസ്ഥാനങ്ങളിലേക്ക് വ്യാപിപ്പിക്കാനാണ് തീരുമാനിച്ചിരിക്കുന്നത്.
