ലക്നൗ : ഉത്തർപ്രദേശ് മുഖ്യമന്ത്രിയായി വീണ്ടും സത്യപ്രതിജ്ഞ ചെയ്ത് അധികാരത്തിൽ ഏറിയതിന് പിന്നാലെ നിയമസഭയിൽ അംഗങ്ങളെ അഭിസംബോധന ചെയ്ത് യോഗി ആദിത്യനാഥ്. ഉത്തർപ്രദേശിലെ ജനങ്ങൾക്ക് വേണ്ടി ഭരണപക്ഷവും പ്രതിപക്ഷവും ഒന്നിച്ച് പ്രവർത്തിക്കുമെന്ന് അദ്ദേഹം ഉറപ്പ് നൽകി. വീണ്ടും അധികാരത്തിൽ ഏറിയതിന് ശേഷം ആദ്യമായിട്ടാണ് അദ്ദേഹം നിയമസഭയെ അഭിസംബോധന ചെയ്യുന്നത്.
ഉത്തർപ്രദേശിലെ 25 കോടി ജനങ്ങൾക്ക് വേണ്ടി ഭരണപക്ഷവും പ്രതിപക്ഷവും ഐക്യദാർഢ്യത്തോടെ പ്രവർത്തിക്കും. ജനാധിപത്യത്തിന് രണ്ട് ചക്രങ്ങളുണ്ട്- ഒന്ന് ഭരണപക്ഷവും രണ്ടാമത്തേത് പ്രതിപക്ഷവുമാണ്. രണ്ട് പാർട്ടികളും സമൂഹത്തിന്റെ ഉന്നമനത്തിന് വേണ്ടിയാണ് പ്രവർത്തിക്കുന്നത്.
എല്ലാ രാഷ്ട്രീയ പാർട്ടിക്കാരും തിരഞ്ഞെടുപ്പ് സമയത്ത് ആരോപണങ്ങളും പ്രത്യാരോപണങ്ങളും നടത്തിയത് നാം കണ്ടതാണ്. എന്നാൽ ജനങ്ങൾ ഇത്തരം കാര്യങ്ങൾ ഒരിക്കലും വിശ്വസിക്കില്ലെന്ന് തിരഞ്ഞെടുപ്പ് വിജയത്തിലൂടെ വ്യക്തമായി. എല്ലായ്പ്പോഴും പൊതു ജനങ്ങൾ നല്ല വശത്തെ മാത്രമേ പിന്തുണയ്ക്കൂ എന്നും കപട പ്രചാരണങ്ങൾക്ക് അവർ കൂട്ടുനിൽക്കില്ലെന്നും അദ്ദേഹം കൂട്ടിച്ചേർത്തു.
ഫെബ്രുവരി മാസത്തിൽ അഞ്ച് സംസ്ഥാനങ്ങളിൽ നടന്ന നിയമസഭാ തിരഞ്ഞെടുപ്പിൽ നാലിടത്തും ബിജെപിയാണ് വിജയിച്ചത്. യുപിയിൽ തുടർഭരണം ഉറപ്പിച്ചുകൊണ്ട് 37 വർഷത്തെ ചരിത്രമാണ് പാർട്ടി മാറ്റിക്കുറിച്ചത്.
Comments