പാലക്കാട് : ഡിവൈഎസ്പിക്കായി വ്യാജ രേഖ നിർമ്മിച്ച കേസിൽ സിപിഎം ലോക്കൽ കമ്മിറ്റി അംഗം അറസ്റ്റിൽ. വാളയാർ ലോക്കൽ കമ്മിറ്റി അംഗം മുഹമ്മദ് റാഫിയാണ് പിടിയിലായത്. കൊച്ചിയിൽ നിന്നുള്ള സാമ്പത്തിക കുറ്റാന്വേഷണ വിഭാഗം വിജിലൻസ് ഡിവൈഎസ്പിയും സംഘവുമാണ് ഇയാളെ പിടികൂടിയത്.
കോഴിക്കോട് ക്രൈംബ്രാഞ്ച് ഡിവൈഎസ്പിയായ ഹംസയുമായി ചേർന്ന് റാഫി വ്യാജരേഖ ചമച്ച് ഭൂമി ഇടപാടിന് ശ്രമിച്ചതായി അന്വേഷണ സംഘം കണ്ടെത്തി. അനധികൃത സ്വത്ത് സമ്പാദനം നടത്തിയെന്ന പരാതിയിൽ 2019 ൽ ഹംസയുടെ പാലക്കാടുള്ള വീട് വിജിലൻസ് സംഘം പരിശോധിച്ചിരുന്നു. കണക്കിൽ പെടാത്ത ഒൻപത് ലക്ഷത്തിലധികം രൂപയുടെ സ്വർണവും പിടിച്ചെടുക്കുകയുണ്ടായി.
തുടർന്ന് അനധികൃത സമ്പാദനമുണ്ടായിട്ടില്ലെന്ന് തെളിയിക്കാൻ മുഹമ്മദ് റാഫിയും ഹംസയും മരിച്ചയാളുടെ പേരിൽ വ്യാജ രേഖയുണ്ടാക്കി എന്നാണ് കണ്ടെത്തൽ. കേസിൽ ഉന്നതതല അന്വേഷണം വേണമെന്ന് ആവശ്യപ്പെട്ട് കോൺഗ്രസ് പ്രവർത്തകർ പ്രകടനം നടത്തി.
