ചണ്ഡീഗഡ് : പഞ്ചാബിൽ മുഖ്യമന്ത്രിയായി അധികാരത്തിൽ ഏറിയ ആം ആദ്മി നേതാവ് ഭഗവന്ത് മന്നിന്റെ വീഡിയോ സമൂഹമാദ്ധ്യമങ്ങളിൽ വൈറലായിരിക്കുകയാണ്. 1.80 കോടി രൂപ ചെലവ് വരുന്ന പാലം താൻ എങ്ങനെ ആറ് ലക്ഷം രൂപയ്ക്ക് നിർമ്മിച്ചു എന്ന് മുഖ്യമന്ത്രി തന്നെ വിശദീകരിക്കുന്ന വീഡിയോയാണിത്. വീഡിയോ വൈറലായതോടെ പാലം അന്വേഷിച്ചും നിരവധി പേർ ഇറങ്ങിപ്പുറപ്പെട്ടു. എന്നാൽ രണ്ട് കോൺക്രീറ്റ് തൂണുകൾ മാത്രമാണ് കാണാൻ സാധിച്ചത്.
‘പഞ്ചാബിലെ സങ്ക്രൂർ ജില്ലയിലെ ദിർബ ഗ്രാമത്തിൽ പാലം അത്യാവശ്യമായിരുന്നു. പാലം നിർമ്മിക്കാൻ ഡെപ്യൂട്ടി കമ്മീഷണറോട് എസ്റ്റിമേറ്റ് ആവശ്യപ്പെട്ടു. 1.80 കോടി രൂപ പാലം നിർമ്മിക്കാൻ ചെലവാകും എന്നാണ് ഉദ്യോഗസ്ഥൻ പറഞ്ഞത്. പ്രതിവർഷം 5 കോടി മാത്രം സർക്കാരിൻ നിന്നും ഫണ്ട് ലഭിക്കുന്ന തനിക്ക് എങ്ങനെയാണ് ഇത്രയും തുക കൊണ്ട് ഒരു പാലം പണിയാൻ സാധിക്കുക എന്ന് വിചാരിച്ചുപോയി. അപ്പോഴാണ് എന്റെ ഒരു എൻജിനീയർ സുഹൃത്തിനെ കാണാൻ തീരുമാനിച്ചത്. ആ സുഹൃത്ത് എനിക്ക് ആറ് ലക്ഷം രൂപയ്ക്ക് പാലം പണിത് തരാമെന്ന് പറഞ്ഞു. അങ്ങനെ ഞങ്ങൾ ആറ് ലക്ഷത്തിന്റെ പാലം പണിതു’ ഭഗവന്ത് മൻ പറഞ്ഞു.
താൻ എല്ലാ പണവും ജനങ്ങൾക്ക് വേണ്ടിയാണ് ചെലവാക്കുന്നത് എന്നും വീഡിയോയിൽ മൻ പറയുന്നുണ്ട്. നിയമസഭാ തിരഞ്ഞെടുപ്പ് നടക്കുന്നതിന് മുന്നോടിയായി പ്രചാരണത്തിന്റെ ഭാഗമായി പുറത്തുവിട്ട വീഡിയോയാണിത്.
ഇത് വൈറലായതോടെ ആറ് ലക്ഷം രൂപയുടെ പാലം അന്വേഷിച്ച് ആളുകൾ ഇറങ്ങിത്തിരിച്ചു. എന്നാൽ ആ പാലം ആർക്കും കണ്ടെത്താനായില്ല. പാലത്തിന് പകരം രണ്ട് കോൺക്രീറ്റ് തൂണുകൾ വെള്ളത്തിന് മുകളിൽ സ്ഥാപിച്ചത് മാത്രമാണ് കണ്ടത്. ഇതോടെ ജനങ്ങളെ പറഞ്ഞു പറ്റിക്കുന്ന നേതാവിനെതിരെ നാട്ടുകാരും തിരിഞ്ഞു.
Comments