പാലക്കാട്: ശിശുപരിചരണ കേന്ദ്രത്തിൽ കുട്ടിയെ മർദ്ദിച്ച സംഭവത്തിൽ ശിശുക്ഷേമസമിതി സെക്രട്ടറിയായിരുന്ന കെ വിജയകുമാറിനെതിരെ കേസെടുത്തു. പാലക്കാട് നോർത്ത് പോലീസാണ് കേസെടുത്തത്. ജുവനൈൽ ജസ്റ്റിസ് 75 പ്രകാരവും ഐപിസി 324 വകുപ്പ് ചുമത്തി ജാമ്യമില്ലാ വകുപ്പ് പ്രകാരമാണ് കേസെടുത്തതെന്ന് പോലീസ് അറിയിച്ചു.
സംഭവത്തിൽ പരാതിക്കാരിയായ ആയയുടെ മൊഴി പോലീസ് രേഖപ്പെടുത്തി. ആയ നൽകിയ പരാതി കഴിഞ്ഞദിവസം ജില്ലാഭരണകൂടം പോലീസിന് കൈമാറിയിരുന്നു. പരാതി പുറത്തുവന്നതോടെ കെ വിജയകുമാർ രാജിവെക്കുകയും ചെയ്തു. സിപിഎം തെക്കേത്തറ ബ്രാഞ്ച് സെക്രട്ടറിയായിരുന്ന വിജയകുമാറിനെ പാർട്ടി ചുമതലകളിൽ നിന്ന് നിലവിൽ മാറ്റി നിർത്തിയിരിക്കുകയാണ്.
രക്ഷിതാക്കൾ ഉപേക്ഷിച്ച അഞ്ചുവയസിന് താഴെയുള്ള കുഞ്ഞുങ്ങളെ സംരക്ഷിക്കുന്ന അയ്യപുരത്തെ ശിശുപരിചരണ കേന്ദ്രത്തിലാണ് കേസിനാസ്പദമായ സംഭവം. പല തവണയായി ശിശുക്ഷേമ സെക്രട്ടറി കെ വിജയകുമാർ കുഞ്ഞുങ്ങളെ മർദ്ദിച്ചെന്നാണ് പരാതി. സ്കെയിൽ വച്ച് തല്ലിയെന്ന് ആയയും മൊഴി നൽകിയിരുന്നു.
