ലിസ്സി: ഇന്ത്യയുമായുള്ള സൗഹൃദത്തെ വാനോളം പുകഴ്ത്തി നെതർലാന്റ്സ് ഉപപ്രധാനമന്ത്രിയും വിദേശകാര്യമന്ത്രിയുമായ വോപ്കെ ഹോക്സ്ട്ര. ഇന്ത്യയുമായുള്ള സൗഹൃദം വിലമതിക്കാനാകാത്തതാണെന്ന് അദ്ദേഹം പറഞ്ഞു. രാഷ്ട്രപതി രാം നാഥ് കോവിന്ദിന്റേയും സിവിത കോവിന്ദിന്റേയും ത്രിദിന സന്ദർശനത്തോട് അനുബന്ധിച്ചായിരുന്നു ഹോക്സ്ട്രയുടെ പ്രസ്താവന. പ്രസിഡന്റിന്റെ സന്ദർശനം ഇന്ത്യ-നെതർലാന്റ്സ് ബന്ധത്തിന്റെ പ്രാധാന്യത്തെ കാണിക്കുന്നുവെന്നും അദ്ദേഹം ചൂണ്ടിക്കാട്ടി.
നെതർലാന്റ്സിനെ സംബന്ധിച്ചടുത്തോളം വളരെ പ്രാധാന്യമർഹിക്കുന്ന ഒന്നാണ് ഇന്ത്യൻ പ്രസിഡന്റിന്റെ സന്ദർശനമെന്ന് ഹോക്സ്ട്ര പറഞ്ഞു. ഇന്ത്യയുമായുള്ള സൗഹൃദത്തിന് തങ്ങൾ വളരെ വില നൽകുന്നുണ്ട്. പണ്ട് മുതൽ നെതർലാന്റ്സുമായി ഇന്ത്യ നല്ല ബന്ധം പുലർത്തുന്നുണ്ട്. അത് ഇനിയും മികച്ചതായി തുടരുമെന്നും വരും കാലത്ത് ബന്ധം വളരെ മികച്ചതാക്കാൻ ശ്രമിക്കുമെന്നും അദ്ദേഹം പറഞ്ഞു.
നെതർലാന്റ്സിൽ നിരവധി ഇന്ത്യക്കാർ താമസിക്കുന്നുണ്ട്. അവർ രാജ്യത്തിന് നൽകുന്ന സംഭാവനകളേയും ഹോക്സ്ട്ര പ്രശംസിച്ചു. ഇന്ത്യൻ പൗരന്മാർ ഇവിടെയുള്ളതിൽ അഭിമാനിക്കുന്നുവെന്നാണ് ഹോക്സ്ട്ര പറഞ്ഞത്. ബിസിനസ്സിലും ജീവിതത്തിന്റെ മറ്റെല്ലാ മേഖലകളിലും അവർ വലിയ സംഭാവനകളാണ് നൽകുന്നത്. ഇരുരാജ്യവും തമ്മിലുള്ള സൗഹൃദത്തിന്റേയും ഉഭയകക്ഷി ബന്ധത്തിന്റേയും വ്യാപാര ബന്ധത്തിന്റേയും ആഴവും പരപ്പും വർദ്ധിച്ചുവെന്നും ഹോക്സ്ട്ര പറഞ്ഞു.
വില്ല്യം അലക്സാണ്ടർ രാജാവിന്റേയും മാക്സിമ രാജ്ഞിയുടേയും ക്ഷണപ്രകാരമാണ് രാഷ്ട്രപത്രി നെതർലാന്റ്സ് സന്ദർശിക്കുന്നത്. 1988ൽ രാഷ്ട്രപതി ആർ വെങ്കിട്ടരാമൻ സന്ദർശിച്ചതിന് ശേഷം ആദ്യമായാണ് ഒരു രാഷ്ട്രപതി നെതർലാന്റ്സ് സന്ദർശിക്കുന്നത്. നെതർലാന്റ്സും ഇന്ത്യയും നയതന്ത്ര ബന്ധത്തിന്റെ 75-ാം വാർഷികം ആഘോഷിക്കുകയാണ്. ഇതിന്റെ ഭാഗമായാണ് പ്രസിഡന്റ് രാം നാഥ് കോവിന്ദിന്റെ സന്ദർശനം.
Comments