തിരുവനന്തപുരം: സിപിഎം ജനറൽ സെക്രട്ടറി സീതാറാം യെച്ചൂരിയേയും കോൺഗ്രസ് നേതാവ് രാഹുൽ ഗാന്ധിയേയും പരിഹസിച്ച് ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ. അഖിലേന്ത്യാ തലത്തിൽ ഒരുമിച്ച് നിൽക്കുന്ന കോൺഗ്രസും സിപിഎമ്മും തമ്മിൽ കേരളത്തിൽ നടക്കുന്നത് ചക്കളത്തിപ്പോരാണെന്ന് സുരേന്ദ്രൻ പറഞ്ഞു.
വാളയാറിന് അപ്പുറം സിപിഎമ്മിന്റെ നേതാവ് രാഹുൽ ഗാന്ധിയാണ്. സിപിഎം ജനറൽ സെക്രട്ടറി സീതാറാം യെച്ചൂരിയാണ് സോണിയ ഗാന്ധിയുടെ ഉപദേഷ്ടാവ്. എന്നാൽ കേരളത്തിൽ കോടിയേരിയും സുധാകരനും മലയാളികളെ കബളിപ്പിക്കുകയാണ്. സിപിഐഎമ്മും കോൺഗ്രസും ഒരു മുന്നണിയായി തന്നെയാവും 2024-ലെ ലോക്സഭാ തിരഞ്ഞെടുപ്പിൽ മത്സരിക്കുകയെന്ന് ഉറപ്പാണെന്നും സുരേന്ദ്രൻ പറഞ്ഞു.
ഏത് അവിശുദ്ധ സഖ്യത്തിനെയും തോൽപ്പിക്കാൻ ബിജെപി പ്രാപ്തമാണ്. ജനങ്ങൾ നരേന്ദ്രമോദിക്ക് ഒപ്പമാണെന്നാണ് നാല് സംസ്ഥാനങ്ങളിലെ തിരഞ്ഞെടുപ്പ് ഫലം തെളിയിക്കുന്നത്. ജനങ്ങളുടെ കണ്ണിൽ പൊടിയിടുന്നത് നിർത്തി, കേരളത്തിലും ഒരുമിച്ച് മത്സരിക്കാൻ ഇരു പാർട്ടികളും തയ്യാറാകണമെന്നും സുരേന്ദ്രൻ പറഞ്ഞു.
