വെടിയേറ്റ് കൊല്ലപ്പെട്ടയാൾക്ക് ഗോയിങ്-എവേ പാർട്ടി; നിശാക്ലബ്ബിൽ അലങ്കരിച്ച് നിർത്തി മൃതദേഹം; സംസ്‌കാര ചടങ്ങിന്റെ ദൃശ്യങ്ങൾ വിവാദത്തിൽ

സംസ്‌കാര ചടങ്ങുകൾ പലതരത്തിൽ നടത്താറുണ്ട്. കൊട്ടും പാട്ടും ഡാൻസും മേളവുമൊക്കെയായി നടത്തുന്നവർ, കറുപ്പ്-വെള്ള എന്നിങ്ങനെ വസ്ത്രധാരണത്തിൽ ശ്രദ്ധകേന്ദ്രീകരിച്ച് നടത്തുന്നവർ, ദിവസങ്ങൾ നീണ്ട പരിപാടിയായി ചടങ്ങ് സംഘടിപ്പിക്കുന്നവർ.. അങ്ങനെ പലവിധത്തിൽ സംസ്‌കാര ചടങ്ങുകൾ നടക്കാറുണ്ട്.

എന്നാൽ വളരെ വ്യത്യസ്തമായൊരു സംസ്‌കാര ചടങ്ങിന് സാക്ഷ്യം വഹിച്ചിരിക്കുകയാണ് അമേരിക്ക. ബാച്ചിലർ പാർട്ടി, വെഡ്ഡിങ് പാർട്ടി എന്നൊക്കെ പറയുന്നത് പോലെ ഇവിടെ മരിച്ചയാൾക്ക് ഗോയിങ്-എവേ പാർട്ടിയാണ് പ്രിയപ്പെട്ടവർ നൽകിയത്.

ഗൂന്യൂ എന്ന പേരിൽ അറിയപ്പെട്ടിരുന്ന അമേരിക്കൻ റാപ്പർ മാർക്കെല്ലെ മോറോയുടെ സംസ്‌കാര ചടങ്ങാണ് അദ്ദേഹത്തിന്റെ മരണവാർത്തയേക്കാളേറെ വാർത്തകളിൽ ഇടംപിടിച്ചത്. വെടിയേറ്റ് കൊല്ലപ്പെട്ടയാളായിരുന്നു മാർക്കെല്ലെ മോറോ.

നിശാക്ലബ്ബിൽ വൻ ആഘോഷമായാണ് ചടങ്ങുകൾ സംഘടിപ്പിച്ചത്. പാട്ടും നൃത്തവും ഭക്ഷണവുമൊക്കെയായി വളരെ മനോഹരമായൊരു ആഘോഷ രാവായിരുന്നു സംസ്‌കാര ചടങ്ങ്. ചടങ്ങിലെ ഏറ്റവും വലിയ ആകർഷണം മൃതദേഹം അലങ്കരിച്ചുവെച്ചതാണ്. നിശാക്ലബ്ബിലെത്തിയ ആളുകൾ നൃത്തം ചെയ്യുന്നതിന് സമീപം സ്റ്റേജിൽ, പുത്തൻ വസ്ത്രങ്ങളും കൂളിങ് ഗ്ലാസുമെല്ലാം ധരിപ്പിച്ച് പ്രതിമയാക്കി നിർത്തിയിരിക്കുകയായിരുന്നു റാപ്പറിനെ. തലയിൽ കിരീടവും മൃതദേഹത്തിന്റെ കൈയ്യിൽ സ്മാർട്ട് ഫോണും നൽകാൻ അലങ്കരിച്ചവർ മറന്നില്ല. ഒറ്റ നോട്ടത്തിൽ മരിച്ചുപോയ റാപ്പർ നിശാക്ലബിൽ പങ്കുച്ചേരുകയാണെന്ന് തോന്നിപ്പോകും.

Popular rapper Goonew was shot and killed in Prince George's County. His family hosted his funeral in a club where his body was propped up like a mannequin to join the celebration. pic.twitter.com/ge1mvpzISq

— Coki (@Zucoki) April 4, 2022

ഗോയിങ്-എവേ പാർട്ടിയുടെ ദൃശ്യങ്ങൾ ട്വിറ്ററിൽ പ്രചരിച്ചതോടെയാണ് അദ്ദേഹത്തിന് ലഭിച്ച യാത്രയയപ്പ് ചർച്ചയായത്. മകന്റെ മരണത്തിൽ സങ്കടപ്പെടാൻ ആഗ്രഹിക്കുന്നില്ലെന്നാണ് ചടങ്ങിനെക്കുറിച്ച് മാർക്കെല്ലെ മോറോയുടെ അമ്മയുടെ പ്രതികരണം. ഒടുവിലായി മകന് നൽകാൻ കഴിയുന്ന ഏറ്റവും നല്ല അംഗീകാരം നൈറ്റ് ക്ലബ്ബിൽ സംഘടിപ്പിക്കുന്ന ഈ ആഘോഷമാണെന്നും അമ്മ കൂട്ടിച്ചേർത്തു. സംഭവത്തിനെതിരെ ഒരു കൂട്ടർ രൂക്ഷ വിമർശനവുമായി രംഗത്തെത്തിയിരുന്നു. ഇതോടെ നിശാക്ലബ്ബിലെ അധികൃതർ ക്ഷമാപണം ചോദിക്കുകയും ചെയ്തു. ആഘോഷം ഇത്തരത്തിലാകുമെന്ന് പ്രതീക്ഷിച്ചില്ലെന്ന് അവർ വ്യക്തമാക്കി.

24 കാരനായ മാർക്കെല്ലെ മോറോ ഏതാനും ദിവസങ്ങൾക്ക് മുമ്പാണ് മരിച്ചത്. മേരിലാൻഡിലെ കാർ പാർക്കിംഗ് സ്ഥലത്ത് വെടിയേറ്റ നിലയിൽ അദ്ദേഹത്തെ കണ്ടെത്തുകയായിരുന്നു. കൊലപാതകത്തിൽ പോലീസ് അന്വേഷണം പുരോഗമിക്കുകയാണ്.