പാരീസ്: പൊതുസ്ഥലത്ത് ശിരോവസ്ത്രം ധരിക്കുന്നവർക്കെതിരെ പിഴ ചുമത്തുമെന്ന് ഫ്രഞ്ച് പ്രസിഡന്റ് സ്ഥാനാർത്ഥി മറൈൻ ലെ പെൻ. സ്വകാര്യമാദ്ധ്യമത്തിന് നൽകിയ അഭിമുഖത്തിലാണ് പെൻ നിലപാട് വ്യക്തമാക്കിയത്.
കാറുകളിൽ സീറ്റ് ബെൽറ്റ് ധരിക്കാത്തത് നിയമവിരുദ്ധമായത് പോലെ തന്നെ പൊതുസ്ഥലത്ത് ശിരോവസ്ത്രം ധരിക്കുന്നതും നിയമവിരുദ്ധമാകുമെന്ന് അവർ വ്യക്തമാക്കി. പോലീസിന് നിയമം നടപ്പിലാക്കാൻ എളുപ്പത്തിൽ സാധിക്കുമെന്ന് കരുതുന്നതായി അവർ കൂട്ടിച്ചേർത്തു. നിയമം നടപ്പിലാക്കാൻ ജനഹിതപരിശോധന നടത്തുമെന്നും അവർ പറഞ്ഞു.
ഫ്രാൻസിൽ സ്‌കൂളുകളിൽ വ്യക്തമായി കാണാവുന്ന രീതിയിൽ മതചിഹ്നങ്ങൾ ഉപയോഗിക്കുന്നതിനും പൊതു സ്ഥലത്ത് പൂർണമായും മുഖം മൂടുന്നതിനും നേരത്തെ തന്നെ വിലക്ക് ഏർപ്പെടുത്തിയിട്ടുള്ളതാണ്.
അതേസമയം കഴിഞ്ഞ ഞായറാഴ്ച നടന്ന ആദ്യ റൗണ്ട് വോട്ടെടുപ്പിൽ നിലവിലെ പ്രസിഡന്റ് ഭൂരിപക്ഷം നേടിയിരുന്നു. പെൻ രണ്ടാം സ്ഥാനത്തേയ്‌ക്ക് പിന്തള്ളപ്പെട്ടിരുന്നു. എന്നാൽ ഏപ്രിൽ 24 ലെ റൺ-ഓഫിൽ താൻ വിജയിക്കാനുള്ള സാധ്യത കൂടുതലാണെന്നാണ് 53 കാരിയായ മറൈൻ ലെ പെൻ പറയുന്നത്.
