തിരുവനന്തപുരം: സിപിഎം പാർട്ടി കോൺഗ്രസിൽ മാദ്ധ്യമപ്രവർത്തകനെ കയ്യേറ്റം ചെയ്ത സംഭവത്തിൽ പ്രതികരണവുമായി ബിജെപി സംസ്ഥാന വക്താവ് സന്ദീപ് വാചസ്പതി. “ഞങ്ങടെ സഖാക്കൾ ഞങ്ങളെ തല്ലിയാൽ നിങ്ങക്കെന്താ നാട്ടാരെ” എന്ന പരിഹാസത്തോടെയാണ് സന്ദീപ് ഫേസ്ബുക്കിൽ വീഡിയോ പങ്കുവെച്ചിരിക്കുന്നത്.
ദില്ലി ഗോൾ മാർക്കറ്റിലെ സിപിഎം ആസ്ഥാനത്ത് ഓഫീസ് സെക്രട്ടറി എത്തുന്നതിന് മുൻപ് എത്തി, ഓഫീസ് അടച്ചതിന് ശേഷം മാത്രം വീട്ടിൽ പോകുന്ന ദില്ലിയിലെ മാധ്യമ പ്രവർത്തകരുടെ പരമ്പരയിലെ അവസാന കണ്ണിയാണ് പാർട്ടി കോൺഗ്രസ് വേദിയിൽ തല്ലുകൊള്ളുന്ന ഈ ബൽറാം നെടുങ്ങാടി. ഈ ജനുസിൽപ്പെട്ട ഏക ആളെന്നും വേണമെങ്കിൽ പറയാം. യച്ചൂരിയെക്കാൾ ആത്മാർത്ഥമായി പാർട്ടിയെ സേവിക്കുന്ന ആളെ തന്നെ സഖാക്കന്മാർ പഞ്ഞിക്കിടുന്നത് കാണുമ്പോൾ ഒരു വിഷമം. പാർട്ടി കോൺഗ്രസിന്റെ തിരക്ക് കഴിയുമ്പോൾ സഖാവ് യച്ചൂരി ഇതിലൊരു അന്വേഷണം നടത്തുമായിരിക്കും എന്നും സന്ദീപ് ഫേസ്ബുക്ക് കുറിപ്പിൽ വ്യക്തമാക്കുന്നു.
സമാപന ദിവസമായ ഇന്നാണ് കണ്ണൂരിൽ പാർട്ടി സമ്മേളനത്തിനിടെ മാദ്ധ്യമപ്രവർത്തകനു നേരെ കയ്യേറ്റം നടന്നത്. സംഘാടക സമിതിയിലെ സഖാക്കളാണ് മാദ്ധ്യമപ്രവർത്തകനെ കയ്യേറ്റം ചെയ്യുന്നത്. മര്യാദയ്ക്ക് പറഞ്ഞത് അനുസരിച്ചില്ലെങ്കിൽ എല്ലാവരെയും പിടിച്ച് പുറത്താക്കുമെന്നായിരുന്നു പാർട്ടി നേതാവിന്റെ ഭീഷണി. എല്ലാ സ്ഥലത്തും കളിക്കും പോലെ നിങ്ങൾ ഇവിടെ കളിക്കേണ്ട എന്നാണ് നേതാവ് മാദ്ധ്യമപ്രവർത്തകനെ തള്ളിക്കൊണ്ട് ഭീഷണിപ്പെടുത്തുന്നത്. സിപിഎം അനുഭാവിയായ മാദ്ധ്യമപ്രവർത്തകനാണ് ബൽറാം നെടുങ്ങാടി എന്നതാണ് സംഭവത്തിലെ മറ്റൊരു തമാശ.
അതേ സമയം കൂട്ടത്തിലുള്ള ഒരു മാദ്ധ്യമപ്രവർത്തകനെ കയ്യേറ്റം ചെയ്തിട്ടും പാർട്ടി പ്രവർത്തകരോട് പരാതി പറയാൻ പോലും ആരും തയ്യാറായില്ല എന്നത് മാദ്ധ്യമപ്രവർത്തകർക്കിടയിൽ തന്നെ അഭിപ്രായ വ്യത്യാസത്തിന് കാരണമായിട്ടുണ്ട്. സംഭവത്തിൽ അന്വേഷണം വേണമെന്നാവശ്യപ്പെട്ട് സമൂഹമാദ്ധ്യമങ്ങളിൽ വീഡിയോ വൈറലാകുന്നുണ്ട്.
