ഹൈദരാബാദ്: ആന്ധ്രയിൽ രാജിവെച്ച മന്ത്രിസഭയ്ക്ക് പകരം ചുമതലയേൽക്കുന്ന മന്ത്രിമാരുടെ പട്ടിക വൈഎസ്ആർ പാർട്ടി അദ്ധ്യക്ഷൻ ജഗൻമോഹൻ റെഡ്ഡി പുറത്തുവിട്ടു. 11 പേർ പഴയ മന്ത്രിസഭയിലെ അംഗങ്ങളാണ്. 14 പേർ പുതുമുഖങ്ങളും.
പട്ടിക അംഗീകാരത്തിനായി രാജ്ഭവനിലേക്കും അയച്ചിട്ടുണ്ട്. തിങ്കളാഴ്ച രാവിലെ 11.31 നാണ് സെക്രട്ടറിയേറ്റിൽ പുതിയ മന്ത്രിമാരുടെ സത്യപ്രതിജ്ഞ നിശ്ചയിച്ചിരിക്കുന്നത്. പെഡ്ഡിറെഡ്ഡി രാമചന്ദ്ര റെഡ്ഡി, ബോത്സ സത്യനാരായണ, ബുഗ്ഗാന രാജേന്ദ്രനാഥ് റെഡ്ഡി, പിനൈപ് വിശ്വരൂപ്, ശ്രീനിവാസ വേണുഗോപാല കൃഷ്ണ, ഗുമ്മനൂർ ജയറാം, സീധിരി അപ്പാല രാജു, അഡിമൂലപു സുരേഷ്, കെ നാരായണസ്വാമി, അംസാദ് ബാഷ, തനേതി വനീത എന്നിവരാണ് മന്ത്രിസഭയിലെ പഴയ മുഖങ്ങൾ
ജാതി, മേഖലാ സമവാക്യങ്ങൾ പാലിച്ചുകൊണ്ടുളളതാണ് മന്ത്രിസഭയെന്നാണ് വൈഎസ്ആർ കോൺഗ്രസിന്റെ വിലയിരുത്തൽ. പരിചയസമ്പന്നരുടെയും പുതുമുഖങ്ങളുടെയും സമ്മിശ്ര രൂപമാണ് മന്ത്രിസഭയെന്നും പാർട്ടി വിലയിരുത്തുന്നു. യുവാക്കൾക്ക് പുതിയ ആശയങ്ങളും പദ്ധതികളും അവതരിപ്പിക്കാനാകുമെന്നും ജഗൻമോഹൻ റെഡ്ഡി വിലയിരുത്തുന്നു.
2024 ൽ നടക്കാനിരിക്കുന്ന നിയമസഭാ തിരഞ്ഞെടുപ്പിൽ വിജയം ഉറപ്പിക്കുന്നതിന് വേണ്ടിയാണ് ജഗൻമോഹൻ റെഡ്ഡി മന്ത്രിസഭയിൽ സമ്പൂർണ അഴിച്ചുപണി നടത്തിയത്.
Comments