ഇലക്ട്രിക് വാഹന വിപ്ലവത്തിനായി പല മുൻനിര വാഹന നിർമ്മാതാക്കളുടെയും കാറുകൾ ഇന്ത്യൻ നിരത്തുകളിലേയ്ക്ക് എത്തുമ്പോൾ, രാജ്യത്തെ ആദ്യത്തെ ഇലകട്രിക് കാർ ഏതെന്ന ചോദ്യത്തിന് പലർക്കും ഉത്തരം അറിയില്ല. ഒരു മലയാളിയാണ് ഇന്ത്യയിലെ ആദ്യത്തെ ഇലക്ട്രിക് കാർ നിർമ്മിച്ചത്. അതിന്റെ വിശദാംശങ്ങളിലേക്ക് നമുക്ക് ഒന്ന് ചെല്ലാം.
ഇന്ത്യയിലെ ആദ്യത്തെ ഇലക്ട്രിക് വാഹനമെന്ന ഖ്യാതി ലവ്ബേർഡിനുള്ളതാണ്. 25 വർഷങ്ങൾക്ക് മുൻപ് രാജ്യത്തെ ആദ്യ ഇലക്ട്രിക് കാർ നിർമ്മിച്ചത് കേരളത്തിലായിരുന്നു. തൃശ്ശൂർ ചാലക്കുടിയിലെ എഡ്ഡി കറന്റ് കൺട്രോൾസ് എന്ന സ്ഥാപനമായിരുന്നു 1993ൽ ലവ്ബേർഡ് എന്ന ഇലക്ട്രിക് കാർ വാണിജ്യ അടിസ്ഥാനത്തിൽ വിപണിയിലെത്തിച്ചത്. എഡ്ഡി ഇലക്ട്രിക് കമ്പനിയാണ് ലവ്ബേർഡ് എന്ന കുഞ്ഞൻ ഇലക്ട്രിക് കാറിനെ രാജ്യത്ത് പരിചപ്പെടുത്തിയത്. 1971ൽ ഗവേഷകനും വ്യവസായിയുമായ എൻ.ഡി ജോസ് ചാലക്കുടിയിൽ സ്ഥാപിച്ച സ്ഥാപനമായിരുന്നു എഡ്ഡി കറൻറ് കൺട്രോൾസ്.
പുത്തൻ സാങ്കേതിക വിദ്യകളിൽ താല്പരനായിരുന്ന എൻ.ഡി ജോസ് 1993 ൽ ലവ് ബേഡ്സ് എന്ന പേരിൽ ഇലക്ട്രിക് കാറുകൾ വിപണിയിൽ എത്തിക്കുകയായിരുന്നു. ജപ്പാനിലെ ടോക്കിയോയിൽ നിന്നുള്ള യാസ്കവ ഇലക്ട്രിക് മാനുഫാക്ച്ചറിംഗ് കമ്പനിയുമായി സഹകരിച്ചാണ് എഡ്ഡി കറന്റ് കൺട്രോൾസ് ഇന്ത്യ ലിമിറ്റഡ് കാർ നിർമിച്ചത്. ഡൽഹിയിൽ നടന്ന ഓട്ടോ എക്സ്പോയിൽ ഈ വാഹനം പ്രദർശിപ്പിക്കുകയും ചടങ്ങിൽ ധാരാളം അവാർഡുകൾ ലഭിക്കുകയും ചെയ്തത് ഏറെ ശ്രദ്ധേയമാണ്. തുടർന്ന് അന്നത്തെ കേന്ദ്ര സർക്കാരും കാറിന് പച്ചക്കൊടി കാട്ടി.
സ്റ്റീൽ ഷാസിയിൽ ഫൈബർ ഗ്ലാസിൽ നിർമ്മിച്ച കുഞ്ഞൻ കാർ, അക്കാലത്തെ ആളുകളുടെ ഇഷ്ടം നേടിയ വാഹനമായിരുന്നു. രണ്ടു പേർക്ക് സഞ്ചരിക്കാവുന്ന ലവ് ബേഡിൽ ലെഡ്-ആസിഡ് ബാറ്ററിയായിരുന്നു ഉപയോഗിച്ചിരുന്നത്. ചാർജ് ചെയ്താൽ 60 കിലോമീറ്റർ മൈലേജ് ലഭിക്കുന്ന ഈ വാഹനം പെർഫോമൻസിന്റെ കാര്യത്തിലും മുന്നിൽ തന്നെയായിരുന്നു.
ചാലക്കുടി, കോയമ്പത്തൂർ എന്നിവിടങ്ങളിലാണ് ലവ്ബേർഡിന്റെ ഉത്പാദനം നടന്നത്. ഡ്രൈവർക്ക് സുഗമമായ സ്പീഡ് കൺട്രോൾ സംവിധാനം നൽകുന്ന ഇലക്ട്രോണിക് ചോപ്പർ കൺട്രോളും ലവ്ബേർഡിന്റെ മറ്റൊരു പ്രത്യേകതയായിരുന്നു. കുഞ്ഞൻ കാറിന് റിവേഴ്സ് ഗിയറോടെയുള്ള നാല് സ്പീഡ് ഗിയർബോക്സും എഡ്ഡി ഇലക്ട്രിക് വാഗ്ദാനം ചെയ്തിരുന്നു.
അക്കാലത്ത് ഫാസ്റ്റ് ചാർജിംഗ് സംവിധാനമൊന്നും ഉണ്ടായിരുന്നില്ല. ബാറ്ററി പായ്ക്ക് പൂർണമായും ചാർജ് ചെയ്യാൻ ഏകദേശം എട്ട് മണിക്കൂറുകളോളം എടുക്കുമായിരുന്നു. 15 ഡിഗ്രി ഗ്രേഡ് പരിധി ഉൾപ്പെടെ മറ്റ് നിയന്ത്രണങ്ങളും ഇലക്ട്രിക് കാറിന് ഉണ്ടായിരുന്നു. അതായത് കാറിന് കുത്തനെയുള്ള ചരിവുകളിൽ കയറാൻ കഴിയില്ലെന്നാണ് ഇതിനർത്ഥം. നഗര ഉപയോഗത്തിനായി മാത്രം കാറുകൾ ആഗ്രഹിക്കുന്ന ഉപഭോക്താക്കളെ ലക്ഷ്യമിട്ടാണ് ഈ ഇലക്ട്രിക് കാർ പുറത്തിറക്കിയിരുന്നതും.
25ഓളം ലവ് ബേഡ് കാറുകളുടെ വിൽപ്പന നടത്താനായെങ്കിലും ഗവണ്മെന്റ് സബ്സിഡി പിൻവലിച്ചതോടെ കമ്പനി ഉത്പാദനം നിർത്തിവയ്ക്കാൻ നിർബന്ധിതരാകുകയായിരുന്നു. ഇതോടെ കാലത്തിന് മുന്നേ സഞ്ചരിച്ച കുഞ്ഞൻ ഇലക്ട്രിക് കാറിന്റെ വിൽപ്പനയ്ക്ക് തിരശ്ശീല വീഴുകയായിരുന്നു.
Comments