ഇസ്ലാമാബാദ് : പാക് മുൻ പ്രധാനമന്ത്രി ഇമ്രാൻ ഖാൻ പുറത്തായതിന് പിന്നാലെ പരിഹാസവുമായി മുൻ ഭാര്യ റെഹാം ഖാൻ. ഇമ്രാൻ ഖാൻ മികച്ച കൊമേഡിയൻ ആണെന്നും ബോളിവുഡിൽ അവസരം നൽകണമെന്നും റെഹാം ഖാൻ ആവശ്യപ്പെട്ടു. കോൺഗ്രസ് നേതാവും പഞ്ചാബ് മുൻ പാർട്ടി അദ്ധ്യക്ഷനുമായ നവജ്യോത് സിംഗ് സിദ്ധുവിനെയും റെഹാം പരിഹസിച്ചു.
പ്രധാനമന്ത്രി സ്ഥാനം നഷ്ടമായ ഇമ്രാൻ ഖാന് ബോളിവുഡിൽ അഭിനയിക്കാൻ അവസരം നൽകണം. അയാൾക്ക് നന്നായി കോമഡി ചെയ്യാൻ സാധിക്കും. ഓസ്കർ പുരസ്കാരം വരെ നേടാൻ കഴിയുന്ന അഭിനേതാവാണ് ഇമ്രാൻ എന്നും റെഹാം ഖാൻ പറഞ്ഞു.
കപിൽ ശർമ്മ ഷോയിൽ നവജ്യോത് സിംഗ് സിദ്ധുവിന് പകരമായി ഇമ്രാനെ പരിപാടിയിലേക്ക് ക്ഷണിക്കാം. സിദ്ധുവും ഇമ്രാനും പണ്ടേ അടുത്ത സുഹൃത്തുക്കളാണെന്നും ഇരുവരും ചേർന്ന് ഇപ്പോൾ കവിത രചന വരെ ആരംഭിച്ചിട്ടുണ്ടെന്നും റെഹാം ഖാൻ പരിഹസിച്ചു.
പ്രധാനമന്ത്രി സ്ഥാനം രാജിവെക്കുന്നതുമായി ബന്ധപ്പെട്ട തർക്കം നിലനിൽക്കുമ്പോഴും റെഹാം ഖാൻ ഇമ്രാനെതിരെ തുറന്നടിച്ചിരുന്നു. മുഖസ്തുതി മാത്രം കേൾക്കുന്ന വ്യക്തിയാണ് ഇമ്രാനെന്നും മറ്റുള്ളവരുടെ ഉപദേശങ്ങൾ അയാൾ വകവെയ്ക്കാറില്ലെന്നുമാണ് മുൻ ഭാര്യ പറഞ്ഞത്. താൻ പറഞ്ഞത് എന്തെങ്കിലും കേട്ടിരുന്നെങ്കിൽ ഇന്നും താൻ അയാളുടെ ഭാര്യയായിരുന്നേനെ എന്നും റെഹാം വ്യക്തമാക്കിയിരുന്നു.
Comments